AQTО́BE. 21 qańtar. Aqtóbe qalasynda oblystyq ortalyq «Nur Ǵasyr» meshitiniń mańynan shamamen myń oryndyq hatymhana salynady dep kútilýde. Bul týraly egemen.kz tilshisi habarlady.
Qazir nysannyń jobalyq-smetalyq qujattary daıyndalyp jatyr. Jańadan eńse tikteıtin ǵımaratta neke qııý, súndetteý bólmeleri de bolady. Sondaı-aq, Aqtóbede «Nur Ǵasyr» meshitiniń muryndyq bolýymen kóktemde respýblıkalyq deńgeıde aqyndardyń ımanı aıtysy uıymdastyrylmaq.
Oblystyq ortalyq «Nur Ǵasyr» meshitiniń ımamy Nurlan qajy Baıjigitulynyń aıtýynsha, jalpy din qyzmetkerleri – ýaǵyz-nasıhat, teris aǵymdarmen jumys, qaıyrymdylyq, dinı saýat ashý sııaqty tórt baǵytta jumys isteıdi. Eldiń, ult pen ulystardyń birligin saqtap, turaqtylyqty qamtamasyz etý maqsatynda nasıhat jumystary júıeli júrgiziledi.
Ol oblys basshylyǵyna meshit janynan hatymhana salý týraly usynys jasap, eskızdik josparyn ázirlegen. Jaqynda jobalyq qujattary daıyn bolady.
Satybaldy Sáýirbaı.
Derek: egemen.kz.
Sýret: muftyat.kz.