ATYRAÝ. 22 qańtar. Atyraýda munaıdy zańsyz satyp alý, tasymaldaý jáne satýmen uzyq ýaqyt aınalysqan uıymdasqan qylmystyq top ustaldy. Bul týraly oblystyq ishki ister departamentiniń baspasóz qyzmetine silteme jasaǵan egemen.kz tilshisi habarlady.
«Uıymdasqan qylmysqa qarsy kúres basqarmasynyń qyzmetkerlerimen jedel-izdestirý is-sharalaryn ótkizý kezinde munaıdy zańsyz satyp alý, tasymaldaý jáne satýmen uzaq ýaqyt aınalysyp kelgen uıymdasqan qylmystyq top qolǵa tústi. Atalǵan qylmystyq toptyń óz áreketterin júzege asyryp kelgen hımııalyq zaýyt aýmaǵyn tekserý barysynda, shıki munaı tıelgen Reseı Federasııasy Volgagrad qalasynyń kommersııalyq uıymyna qarasty MAZ markaly avtokóligi men «Kompozısııalyq turmystyq otyn» túri ekenin rastaıtyn jalǵan qujattar anyqtalyp, tárkilendi. Sonymen qatar, syıymdylyǵy ártúrli on besten astam munaıǵa uqsas qara tústi suıyqtyq toltyrylǵan ydystar ornalastyrylǵan óndiristik seh anyqtaldy. Saraptama qorytyndysyna sáıkes, zertteýge jiberilgen ónimderdiń munaı ekeni belgili boldy. Qazirgi ýaqytta uıymdasqan qylmystyq top qurdy jáne basqardy degen kúdikpen Qazaqstan Respýblıkasynyń 2 azamaty ustaldy», – dep habarlady Atyraý oblystyq ishki ister departamentiniń baspasóz qyzmeti.
Qazirgi ýaqytta departamenttiń tergeý basqarmasymen toptyń bir múshesine qatysty Qylmystyq kodekstiń 262-baby 1-bólimimen, taǵy bir múshesine uıymdasqan qylmystyq topqa qatysqany úshin Qylmystyq kodekstiń 262-baby 2-bólimimen qylmystyq is qozǵaldy. Al munaıdyń qandaı jolmen, qaıdan, qalaı alynǵandyǵy tekserilýde.
Joldasbek Shópeǵul.
Derek: Atyraý oblystyq ishki ister departamentiniń baspasóz qyzmeti.
Sýret: timeskz.kz.