Qańtardyń 23-i kúni Sankt-Peterbýrg qalasynda fýtboldan jastar arasyndaǵy (U-21) halyqaralyq «Dostastyq» Kýbogynyń XXIV týrnıri máresine jetti. Onyń jeńimpazy ataǵyna Reseı quramasy kezekti márte qol jetkizdi. Alań ıeleri fınalda Moldova quramasyn 4:2 esebimen utty.
Týrnırge nebári 8 qurama qatysty. Osynyń ózi bul jarystyń berekesi kete bastaǵanyn baıqatty. Sodan bolar, saıys aıaqtalǵannan keıin Reseı sport mınıstri ári fýtbol federasııasynyń prezıdenti Vıtalıı Mýtko aldaǵy jyly Kýboktyń ne pishimin ózgertý, ne birjola toqtatý kerek ekenin ashyq aıtty.
Jarystyń ózine kelsek, komandalar irikteý oıyndaryn eki topqa bólinip ótkizdi. Onyń birinen – Reseı, ekinshisinen Moldova quramalary top bastap shyǵyp, fınalda kezdesti. A tobyna túsken Qazaqstan quramasy eki matchyn teń ótkizip, bir oıynda utyldy. Atap aıtqanda, bizdiń jastar birinshi kezdesýde moldovandarǵa ese jiberip (0:1), belorýstarmen (0:0) jáne qyrǵyzdarmen (2:2) beıbit tarqasty. Nátıjesinde toptyń sońynda qalyp qoıdy. Sondyqtan kelesi topty tııanaqtaǵan Tájikstan quramasymen 7-8 oryndar úshin talasty. Ol 3:2 esebimen qazaqstandyqtardyń paıdasyna sheshildi. Match birden bizdiń baǵlandardyń shabýylymen bastaldy. Olar alǵashqy goldy da tym erte saldy – 2-mınýtta Ánýar Aǵaısınniń aıaǵynan ushqan dop tordan bir-aq shyqty. Al 14-mınýtta Abat Áıimbetov ekinshi goldy túsirdi. Sodan soń Nozım Babodjonov (17) bir goldyń qarymtasyn qaıtardy. Qalǵan eki gol kezdesý sońynda salyndy. Munyń alǵashqysyn 83-mınýtta Áıimbetov túsirse, kelesisine 85-mınýtta Jahongır Ergashov qol jetkizdi. Oǵan deıin, 76-mınýtta alańda tóbeles bastap ketken qazaqstandyq Ivan Antıpov pen tájikstandyq Tabrezı Davlatmır alańnan qýyldy. Olardyń ustasýlary eki jaqtan da qoldaý alyp, jappaı tóbeleske ulasyp kete jazdady.
Úshinshi oryn úshin talas Qyrǵyzstan jáne Estonııa komandalary arasynda ótti. Kezdesýdiń negizgi ýaqytynda esep ashylmady. Sodan keıin qarsylastar penaltıge júgindi. Onda estondar mergendik pen salqynqandylyq tanytty. Esep – 4:1. 5-oryn úshin Belarýs pen Latvııa arasyndaǵy ushyrasýda da fýtbolshylar qaqpa qulpyn asha almaı, oıynnan keıingi penaltıge salmaq saldy. Ol 5:4 esebimen bulardyń aldyńǵylaryna jeńis ákeldi.
«Dostastyq» Kýbogy óz bastaýyn 1993 jyldyń qańtarynan alady. Týrnır TMD jáne Baltyq elderi chempıondarynyń kýbogy retinde ómirge keldi. Osylaısha 1993-2011 jyldar aralyǵynda klýbtyq komandalardyń qatysýlarymen ótkizildi. Osy jyldarda «Spartak» (Máskeý, Reseı) – 6 ret (1993, 1994, 1995, 1999, 2001, 2001), «Dınamo» (Kıev, Ýkraına) – 4 ret (1996, 1997, 1998, 2002), «Sherıf» (Tıraspol, Moldova) 2 ret (2003, 2009) Kýbokty jeńip aldy. Taǵy 7 komanda týrnırde bir retten jeńiske jetti. Osy qatardaǵy «Dınamo» (Tbılısı, Grýzııa) – 2004, «Lokomotıv» (Máskeý, Reseı) – 2005, «Neftchı» (Baký, Ázerbaıjan) – 2006, «Pahtakor» (Tashkent, О́zbekstan) – 2007, «Hazar-Lenkoran» (Lenkoran, Ázerbaıjan) – 2008, «Rýbın» (Qazan, Reseı) – 2010 jáne «Inter» (Baký, Ázerbaıjan) 2011 jyldary jeńimpaz atandy. Qazaqstan komandalary ishinen eń joǵary tabysqa jetken «Aqtóbe» 2009 jáne 2010 jyldary fınalda «Sherıf» pen «Rýbınge» penaltıde ese jiberip aldy.
Týrnır 2012 jyldan bastap jastary 21-ge deıingi jastar quramalarynyń týrnırine aınaldy. Oǵan endi qatysýǵa tilek bildirgen terme jamaǵattardyń bárine ruqsat berildi. Sodan beri Reseı (2012, 2013, 2016) quramasy 3 ret, Ýkraına (2014) men OAR (2015) bir retten jeńimpazdar tuǵyryna kóterildi.