Portýgalııada «rekordtyq» prezıdent saılaýy aıaqtaldy. Daýys berý qorytyndysy boıynsha birinshi týrda sosıal-demokratııalyq partııadan kandıdat Marselo Rebelo dı Soza jeńiske jetti, dep habarlady Reıter agenttigi.
Bıýlletenderdiń 98 paıyzyn óńdegennen keıingi esep boıynsha Rebelo dı Soza saılaýshylardyń 52,72% daýysyna ıe bolyp, ózge kandıdattardan aıtarlyqtaı ozyp ketken. Osy oraıda prezıdent saılaýyna kelýshilerdiń meılinshe tómen bolǵanyn, nebári 48,4 paıyzdy quraǵanyn da aıta ketý qajet. 67 jasar dı Sozany ózi 1990 jyldary basqarǵan sosıal-demokratııalyq partııanyń ońshyl-sentrısteri qoldaǵan kórinedi. Jańa memleket basshysy óz laýazymyna ústimizdegi jylǵy naýryzdyń sońynda kirisetin bolady.
Avstralııa respýblıkaǵa aınala ma?
Avstralııanyń bir shtatynan ózge barlyq shtattary men aýmaqtarynyń lıderleri eldi parlamenttik monarhııadan respýblıkaǵa aýystyrýǵa qoldaý kórsetken deklarasııaǵa qol qoıdy, dep habarlaıdy VVS-diń Orys qyzmeti.
Qujatqa tek Avstralııanyń respýblıka bolatyn ýaqyty áli kelgen joq dep esepteıtin Batys Avstralııa shtatynyń premeri Kolın Barnett qana qol qoımaǵan kórinedi. Petısııany Avstralııa respýblıkalyq qozǵalysy uıymdastyrǵan. Olardyń maqsaty el konstıtýsııasyna ózgerister engize otyryp, sol arqyly brıtan patshaıymy II Elızavetanyń memleket basshysy bolyp eseptelýine tosqaýyl qoıý. Sonymen birge, Avstralııanyń monarhııalyq mártebesin saqtaýdy jaqtaýshylar ázirge búginde jumys istep turǵan modeldi almastyratyndaı aıqyn memlekettik model joq degen pikir aıtýda.
Qarly borannyń zardaptary aýyr
AQSh-tyń shyǵys aýdandarynda qarly boran saldarynan qaza tapqan turǵyndar sany 28 adamǵa jetken. Amerıkalyqtardyń qaza tabýyna jol-kólik oqıǵasynan alǵan jaraqattar, ýgarly gazben ýlaný jáne qar kúreý barysyndaǵy shekten tys túsken salmaqtan júrek ustamasy sebepker bolǵan kórinedi.
Belgili bolyp otyrǵanyndaı, adamdar AQSh-tyń 10 shtatynda jáne el astanasynda qaza tapqan. AQSh-tyń federaldyq úkimetiniń Vashıngtonda ornalasqan mınıstrlikteri men vedomstvolary qarly boran saldaryna baılanysty dúısenbi kúni jumys istemeıtin bolady. Sonymen birge, dúısenbi kúni qoǵamdyq kóliktiń ishinara óz jumysyn qalpyna keltire bastaǵany da belgili bolyp otyr. Aıta ketý kerek, shyǵystaǵy 11 shtatta tótenshe jaǵdaı jarııalanyp, 200 myńdaı úı elektr jaryǵynsyz qalǵan bolatyn.
Terrormen derbes kúrespek
Iraktyń syrtqy ister mınıstri Ibragım ál-Djaafarı Baǵdattyń elde sheteldik áskerdiń bolýyna qarsy ekenin jáne terrorızmge qarsy ózderiniń derbes kúrespek nıetteri bar ekenin málimdedi.
Irak egemen memleket bolyp tabylady, sondyqtan onyń egemendigine eshkimniń qol suǵýyna jol bermeıdi, dep atap kórsetken mınıstr Bahreınde ótken arab-úndi forýmynda. Sonymen birge, mınıstr sheteldik áskerılerdiń bolýyna tyıym salýdyń áskerı keńesshilerge esh qatysy joq ekenin de eskertken. Osy oraıda Pentagon basshysy Eshton Karterdiń osydan sál burynyraq Sırııanyń Rakka jáne Iraktyń Mosýl qalalaryn «Islam memleketi» terrorshylarynan bosatý operasııasy qurlyq áskerleriniń qatysýymen júzege asýy tıis degen sózin de eske sala ketken jón.
Jarna tólemegender jazalandy
Birikken Ulttar Uıymy osy uıymǵa múshe 15 eldi daýys berý quqynan aıyrdy. Oǵan atalmysh memleketterdiń múshelik jarna boıynsha barynsha kóp bereshek bolýy sebepker bolyp otyr. Eń úlken borysh Venesýelaǵa tıesili eken.
Domınıkan respýblıkasy – 2,1 mıllıon dollar, Sent-Vınsent jáne Grenadına – 2,15 mıllıon dollar, Býrýndııa 1,36 mıllıon dollar bereshek. Osylardyń ishindegi eń bereshegi kóbi Venesýela bolyp otyr. Bul el uzaq ýaqyttar boıy múshelik jarna engizbeýdiń saldarynan 3 mıllıonǵa jýyq boryshqa batqan. Sonymen birge, BUU ekonomıkalyq ahýaldary aýyr elderge aıaýshylyq ta bildirgen. Sondyqtan da Iemen, Somalı, Gvıneıa-Bısaý, Komor araldary sııaqty birqatar elderge eshqandaı shekteý engizbegen.
Eldi mekender qaıtarylýda
Bashar Asadtyń armııasy Ar-Roýda strategııalyq pýnktin sodyrlardan tartyp alyp, sol arqyly Túrkııa shekarasyna tikeleı shyǵatyn joldy bosatty, dep habarlady «Interfaks» agenttigi.
Sırııa armııasy eldiń soltústigindegi Latakııa provınsııasynda ornalasqan Ar-Rabıa qalasyn óz baqylaýyna alǵan. Tabysty shabýyl operasııalary nátıjesinde kóptegen terrorshylar men olardyń qarý-jaraqtary joıylǵan. Buǵan deıin habarlanǵandaı, qańtar aıynyń basynda Sırııa armııasy 2012 jyldan beri terrorshylar baqylaýynda bolyp kelgen strategııalyq mańyzdy sanalatyn Salma eldi mekenin qaıtaryp alǵan bolatyn. Sırııa áskeriniń eldi mekenderdi azat etýi tabysty jalǵasýda.
Shyǵys Azııa – sýyq aýa qursaýynda
Shyǵys Azııaǵa kelgen kútpegen aıazdar Taıvanda 50-den astam adamnyń qaza tabýyna soqtyryp, Ońtústik Koreıada 60 myńdaı týrısti sharasyz kúıge túsirgen. Bul týraly VVS agenttigi habarlap otyr.
Adamdar ólimine kúnniń kúrt sýýy jáne soǵan baılanysty týyndaǵan júrek talmasy problemalary sebepker bolýda. Onyń syrtynda qatty jaýǵan qar Koreıanyń týrıster úshin keń tanymal bolyp tabylatyn Chedjý aralyndaǵy áýejaıdyń jabylýyna aparyp soqtyryp, sonyń saldarynan 500-den astam áýe reısteri keıinge qaldyrylǵan. О́ziniń qolaıly aýa raıymen jáne jaǵalaýlarymen aty málim aralda aýa temperatýrasy mınýs 6 gradýsqa deıin tómendep ketken. Bul sııaqty kútpegen sýyqtar Gonkongqa, Qytaıdyń ońtústigi men Japonııaǵa da óz yqpal tıgizýde.
Jerorta teńizinde jer silkindi
Jerorta teńizinde oryn alǵan eki birdeı jer silkinisiniń tirkelgeni málim bolyp otyr.
Alǵashqy 6,2 baldyq qýatty zilzala Marokkonyń soltústiginde bolǵan. Arada shamamen 10 mınýttaı ótkende jer silkinisi teńizdiń ekinshi shetinde qaıtalanǵan. Bul rette Ispanııanyń ońtústigi zardap shekken kórinedi. 5,3 baldy quraǵan zilzalanyń epısentri portty qala Melılıada bolǵan. Ázirge zardap shekkender týraly aqparat joq.
Internet materıaldary negizinde ázirlendi.