AQTО́BE. 26 qańtar. Azamattyq qorǵaý salasy boıynsha memlekettik júıeni damytýǵa jáne kúsheıtýge qosqan úlesi, óz qyzmetteri boıynsha qol jetkizgen jetistikteri úshin «Ishki ister mınıstrligi tótenshe jaǵdaılar komıtetiniń 2015 jylǵy úzdik jedel-qutqarý jasaǵy» respýblıkalyq V baıqaýynda «Aqtóbe oblysy tótenshe jaǵdaılar departamenti jedel-qutqarý jasaǵy» memlekettik mekemesi top jardy. Bul týraly egemen.kz tilshisi habarlady.
Astana qalasynda ótken tótenshe jaǵdaılar komıtetiniń alqa jıynynda jasaq basshysy Qasymjan Baısadaqovqa ujym qutqarýshylarynyń kórsetken batyl is-qımyldary jáne adamdardy qutqarýdaǵy jedel áreketteri úshin gramota jáne estelik syılyq tabys etildi.
Aıta keteıik, bul aqtóbelik qutqarýshylardyń úshinshi jeńisi, jasaq buǵan deıin respýblıka boıynsha 2011 jáne 2014 jyldary birinshi oryndy ıelengen bolatyn.
Tótenshe jaǵdaılar komıtetiniń basshylyǵy tarapynan joǵary baǵa alǵan jasaq ujymy ótken jyly 531 shuǵyl shaqyrtýǵa baryp, 351 adamdy tóngen qaýipten qorǵap qaldy. Osynshama adamǵa medısınalyq jáne psıhologııalyq kómek kórsetti. Olardyń kúshimen oblystyń ózen-kólderi men toǵandarynda sýǵa ketken 116 adam qutqaryldy. Jol-kólik apatyna ushyraǵan jáne turmystyq sıpattaǵy apattyq jaǵdaıǵa tap bolǵan 226 adam qutqaryldy.
Qazir oblystyq jasaqta 32 qutqarýshy, 46 sýǵa súńgigishter jumys isteıdi. Olardyń basym bóligi birinshi jáne ekinshi klass deńgeıindegi kásibı mamandar bolyp tabylady. Mekemedegi 28 avtokólik qajetti qural-jabdyqtarmen jaraqtandyrylǵan, 32 sýǵa júzý quraldary bar. Sondaı-aq, 14 kúnge jetetin azyq-túlik, dári-dármek, janar-jaǵar maı qory jasaqtalǵan.
Satybaldy Sáýirbaı.
Derek, sýret: egemen.kz.