Aqmola oblysynyń ákimi Selınograd aýdanyndaǵy Rodına aýylyndaǵy qonys toılaryna qatysyp, qýanysh ıelerin quttyqtady. Ol jergilikti turǵyndarmen birge, alǵashqy 4 otbasynyń biri bolyp jańa úıdiń kiltin alǵan Erlan Tasbolatovtyń shańyraq shattyǵynyń kýási boldy.
– Qazaqstan Prezıdenti Nursultan Ábishuly Nazarbaevtyń halyq turmysyn jaqsartý baǵytyndaǵy saıasatynyń arqasynda shalǵaı eldi mekenderde de zamanaýı jańa úılerge qoljetimdilik ornyqty. Shańyraqtaryńyz shattyqqa tolyp, otbasylyq berekege bólenińizder. Búgin óz atymnan Tasbolatovtyń otbasyna teledıdar syılaımyn, – dedi oblys ákimi S.Kýlagın.
«Rodına» agrofırmasy» JShS bas dırektory, Qazaqstannyń Eńbek Eri Ivan Saýerdiń aıtýynsha, aýylda «Nurly Jol» baǵdarlamasymen 2016 jyldyń birinshi jartyjyldyǵynda 14 úı paıdalanýǵa beriledi. Qazirgi kúni toǵyz ǵımaratta ishki árlendirý jumystary júrgizilip jatsa, qalǵan beseýiniń qabyrǵasy kóterilip qaldy.
Sonymen birge, agrofırma basshysy I.Saýer oblys ákimi men jýrnalısterdi 1000 bas saýyn sıyryna arnalǵan mal sharýashylyǵy kesheni qurylysynyń barysymen tanystyrdy. Jobalyq quny 1 mıllıard 10 mıllıon teńge turatyn bul nysan ústimizdegi jyldyń birinshi toqsanynda iske qosylady dep kútilýde.
Jańa qurylystar qarqyn alǵan sharýashylyqta óskeleń talaptarǵa tolyq saı keletin astyq termınaly salynyp jatqanyn kórdik. Syıymdylyǵy 20 000 tonnalyq termınalda astyqty tazalaý, keptirý, saqtaý jáne naryqqa shyǵarýdyń klasterlik júıesi qamtamasyz etiledi.
Baqbergen AMALBEK,
«Egemen Qazaqstan».
Aqmola oblysy,
Selınograd aýdany.