ALMATY. 29 qańtar. Almatydaǵy «Turan» ýnıversıtetinde «Kıno jáne televızııa akademııasy» fakýltetiniń tańdaýly stýdentterine Oraz Ábishev atyndaǵy arnaıy stıpendııany saltanatty túrde tabystady. Bul týraly egemen.kz tilshisi habarlady.
Mádenı shara Qazaqstan derekti kıno óneriniń negizin qalaýshy rejısser, Qazaq SSR-niń Halyq ártisi, Qazaq SSR Memlekettik syılyǵynyń ıegeri Oraz Ábishevtiń 100 jyldyq mereıtoıy qarsańyna oraı uıymdastyryldy.
Qazaqstanda kıno salasynda belgili bir rejısserdiń atyndaǵy arnaıy stıpendııa taǵaıyndaý rásimi buryn-sońdy bolmaǵan.
«Rejıssýra» mamandyǵynyń tańdaýly stýdentterine taǵaıyndalǵan arnaıy stıpendııany Konstantın Sýrov, Serik Sársenbaev, Láıla Syzdyqova ıemdendi.
Stıpendııa ıegerlerin marapattaý rásimi Oraz Ábishevtiń shyǵarmashylyǵy men ǵumyrnamalyq jolyna arnalyp túsirilgen rejısser Jańabek Jetirýovtyń «Oralý» atty derekti fılminiń arnaıy kórsetilimimen ashyldy.
Kesh barysynda «Turan» ýnıversıtetiniń rektory Rahman Alshanov, Oraz Ábishevtiń uly, Qanat Ábishev, rejısserdiń qyzy Gúljahan Ábisheva, uıymdastyrý komıtetiniń orynbasary Gúlbazar Medıeva sóz alyp, arnaıy stıpendııa ıegerlerin quttyqtady.
Oraz Ábishevtiń ónerdegi izbasarlary, Qazaqstan Kınematografıster odaǵynyń tóraǵasy Slambek Taýekel men «Bastaý» Halyqaralyq stýdenttik jáne debıýttik fılmder kınofestıvaliniń dırektory Sergeı Azımov stýdentterge tanymdyq turǵydan úlgi bolarlyqtaı estelikterimen bólisti.
Aınash Esalı.
Derek, sýret: egemen.kz.