– Aıtatyny joq, partııa sezinen alǵan áserimiz keremet. Elimizdiń ár óńirinen kelgen delegattardyń da kóńilderi kóterińki, júzderi jarqyn. Bizdiń árqaısymyzdyń asyǵa kútkenimiz Elbasy N.Nazarbaevtyń sezde jasaǵan baǵdarshamdaı baıandamasy desem, qatelese qoımaspyn. Qashanda eldiń erteńgi damý baǵyttaryna basymdyq beretin Memleket basshysynyń baıandamasy «100 naqty qadam» Ult Josparymen jáne «Qazaqstan naqty jahandyq ahýalda: ósim, reformalar, damý» atty Qazaqstan halqyna Joldaýymen, kúni keshegi «Ult Jospary – qazaqstandyq armanǵa bastaıtyn jol» jobasyndaǵy oılarmen sabaqtas shyqty. Baıandamada daǵdarysty eńserýdiń alǵashqy qadamdarynyń nátıjeleri de nazardan tys qalmady. Osy bes ınstıtýttyq reformany júzege asyrý barysyndaǵy sáttilikter ilgerileýimizge iz ashatyndaı alǵyshart jasaǵanyn ańǵardyq.
Memleket basshysy saılaýaldy baǵdarlamanyń sheshýshi baǵyttaryna toqtaldy. Nursultan Ábishuly daǵdarysqa qarsy turaqtylyq, ekonomıkany qurylymdyq jańǵyrtý, qazaqstandyqtardyń ómir sapasynyń jańa standarttary, memlekettik konstıtýsııalyq patrıotızm jáne aımaqtyq turaqtylyq, ıntegrasııa jáne qaýipsizdik týraly tarqata baıandady. Elbasy qashanǵy ádetindeı álemdi alańdatyp otyrǵan syn-qaterlerdiń betin búrkemelemeı ashyǵyn aıtty. Olardyń da bizdiń elge áseri bolatynyn jasyrmady. Alaıda, bul syn-qaterlerdiń aldyn alý bizdiń birligimizge, tatýlyǵymyz ben turaqtylyǵymyzǵa syna qaǵa almaıtynyn senimdi túrde jetkizdi. Partııanyń saılaýaldy tuǵyrnamasynyń «Qazaqstan 2021: Birlik. Turaqtylyq. Jasampazdyq» dep atalýy da sondyqtan. Búgingi geosıası jaǵdaı, álemdik qarjy daǵdarysy, jer-jerde bolyp jatqan qarýly qaqtyǵystar bizdi burynǵydan da biriktire, tatýlastyra jáne uıymshyl ete túsýi tıis.
Memleket basshysy óz sózinde eldiń erteńin aıqyndaıtyn kóptegen máselelerge mańyz bere sóıledi. 2017 jyldan bastap mektep túlekteriniń kásiptik-tehnıkalyq mamandyqtarǵa tegin oqytylatynyn jadymyzda taǵy bir jańǵyrtty. Qazir eńbek naryǵynda suranysqa ıe mamandyq alýdyń mańyzdylyǵyn qadap aıtty. Men bul arada bizdiń kolledjdiń osy baǵyttaǵy jumysty júıeli júrgizip kele jatqanyn aıta ketýdi jón kórdim. Kolledj Qazaqstan temirjoly ulttyq kompanııasynyń qoldaýymen bolashaq temirjol mamandaryn óndirispen tyǵyz baılanysta daıarlaýda. Elbasy tapsyrmasyna oraı dýaldy oqytý júıesi engizilip, stýdentter bolashaq jumys oryndarynda dáris alý múmkindigine ıe boldy.
Elbasy óz sózinde daǵdarysty eńserýge baǵyttalǵan «Nurly Jol» baǵdarlamasyna ótken jyly bólingen 770 mıllıard teńgeniń 93 paıyzy ıgerilgenin tilge tıek ete kelip, qazirgi jaǵdaıda únemshildik pen uqyptylyqtyń utymdy bolatynyn aıtýy da ýaqyt talaby ekeni sózsiz. Sondaı-aq, qanshama daǵdarys degenmen, Úkimettiń áleýmettik mindettemelerin oryndap otyrǵanyna kóz jetkizdik. Buǵan zeınetaqynyń, eńbekaqynyń, shákirtaqynyń jáne áleýmettik tólemderdiń óskeni de dálel bolady.
Sezde partııanyń «Qazaqstan-2021: Birlik. Turaqtylyq. Jasampazdyq» atty saılaýaldy baǵdarlamasy qabyldandy, Parlament Májilisi saılaýyna úmitkerlerdiń partııalyq tizimi bekitildi. Biz partııalyq tizimnen elimizge belgili, bedeldi azamattardyń aty-jónin kórip, el bolashaǵy budan góri de baqýatty bolatynyna kámil sendik. Partııa Tóraǵasynyń paıymdaýlaryna qarap, daǵdarystyń damýǵa kedergi bola almaıtynyna kózimiz anyq jetti.
Elbasy aldaǵy saılaýdy kóptegen elderdiń baıqaýshylary qadaǵalaıtynyn,sondyqtan úmitkerlerdiń ashyq, ádil jáne básekelestik jaǵdaıynda ótetin saılaýǵa tııanaqty daıyn bolýy kerektigine nazar aýdardy.
Elimizde «Baq bererde yrys qonady, ustanymy durys bolady» degen sóz bar. Jumyla ister jumysymyz jeńil bolyp, Elbasynyń eldi daǵdarystan jeńil alyp shyǵýǵa jasalǵan baǵdarlamalarynyń iske asýyna atsalysyp, «Máńgilik El» uǵymyn ultymyzdyń uly baǵdaryndaı ustanyp, azamattary parasatty, turmysy baqytty el bolýǵa umtylaıyq der edim. Buǵan bizdiń saıası jáne ekonomıkalyq áleýetimiz jetedi. Endigi maqsat – birligimizdi bekem ustanyp, turaqtylyǵymyzdyń tuǵyryn bekite túsý bolmaq. Bul baǵytta Elbasy aınalasyna toptasa qımyldap, elimizdiń damyǵan otyzdyqqa enýine eleýli úles qosalyq der edim. Búgingi áser osylaı aıtqyzady. Bul bizdi jańa jeńisterge jetkizeri sózsiz. Qazirgi meje álemdik daǵdarysty eńserý ekenin árbir qazaqstandyq meılinshe túsinetinine senimim mol.
Jazyp alǵan
Satybaldy Sáýirbaı,
«Egemen Qazaqstan».
Aqtóbe oblysy.