Ár adam da el kórgisi, jer kórgisi keletin bolar. Kóńilge jaıly demalys oryndarynda demalǵysy, tabıǵaty tamasha jerlerdi aralaǵysy keletin shyǵar. Kim saıahattaǵysy kelmeıdi deısiz? Biraq, kim-kim de túptiń túbinde báribir týǵan jerin, týǵan elin ańsap turady. Ras, álemde tabıǵaty ásem, kórikti jerler kóp bolǵanymen, báribir týǵan jerdiń aýasyna, týǵan eldiń qadirine eshteńe jetpeıdi. Elin, halqyn súıetin júrek týǵan jerge tartyp turatyny daýsyz. Jumys babymen ózge elden tabys taýyp, baqýatty bolýy múmkin, alaıda, jat jerde, jat elde baqytty ómir súrgen jan kezdese qoımas. Keshe Elbasy Nursultan Nazarbaevtyń «Nur Otan» partııasynyń HVII sezinde «Baılyq ta, baqyt ta, ómir de óz elińde. Syrttan baqyt izdegenniń isi baıandy bolǵanyn kórgenim joq, qansha mıllıarder bolsań da, qyzyqtyń barlyǵy óz elińde, óz bala-shaǵańnyń janynda», –degenin tikeleı efırden tyńdaı otyryp, munyń ras ekenine kóz jetkizdim.
Shynynda da, bizdiń elimizde bári de bar: kásiptiń san túrin ashýshylarǵa memlekettik qoldaý da, Shymbulaq, Býrabaı sekildi tabıǵaty kórkem demalys oryndary da jetkilikti. Memleketimiz táýelsizdigin alǵaly beri shaǵyn jáne orta bıznestiń órkendeýine túrli jeńildikterdi kórsetip keledi. Egin egip, tórt túlik mal ósiremin deýshilerge san-alýan sýbsıdııalar túrinde kómek beriledi. Tipti, han saraıyndaı kottedj turǵyzamyn deýshilerdiń de qolyn eshkim qaǵyp otyrǵan joq. Solaı desek te, memlekettiń qoldaýymen elden tapqan tabysyn otandyq ekonomıkany órkendetýge ınvestısııa retinde salýdan góri syrtqa shyǵarǵysy keletinder de áli bar sekildi. Endi sheteldegi qarjyń men múlkińdi jarııa etip, bıznesti óz Otanyńdy órkendetýge baǵytta degendi túsinetin ýaqyt jetken sekildi.
Elbasy Nursultan Nazarbaev «Barlyǵyn shetelge aparyp, qarjyny tyǵyp sonsha ne boldy? Sonyń barlyǵyn alyp kelińder dep zańdastyrýdy jasap otyrmyz. Aıyptamaımyz, keshiremiz, eshkimdi qýdalamaımyz. Alyp kelińder de, eldiń ishinde bolyp jatqan jekeshelendirýge qatysyp, bir úlken nysandy satyp alyńdar da, sodan tabys taýyp, halyqqa jumys beresińder jáne eldiń ekonomıkasyn kóteresińder», – deýiniń dál qazirgi sátte mańyzy tipten erekshe ekenine shúbá joq. О́ıtkeni, álem elderindegi qarjylyq daǵdarystyń dendep turǵan shaǵynda el azamattary ózderiniń otanshyldyǵyn shettegi dáýletin el ekonomıkasyna ınvestısııa túrinde salýymen de tanyta alar edi. Sóıtip, bir jaǵynan otandyq bıznestiń keń qanat jaıýyna da, ekinshiden, elimizdiń ekonomıkalyq órkendeýine de úlesin qosady.
Teginde, «О́zge elde sultan bolǵansha, óz elińde ultan bol» degen halyq danalyǵy árkimniń de oıynda júrgeni jón. Baqytqa da, baılyqqa da, barlyq qyzyqqa da óz elimizde ǵana kenelgenimizge ne jetsin!
Samat SAǴYNDYQOV,
«Embimunaıgaz» AQ qyzmetkeri,
«Nur Otan» partııasynyń múshesi.
Atyraý oblysy.