Ulttyq mýzeıde Qazaq Ulttyq óner ýnıversıtetiniń «Jyrshylyq óner» kafedrasy stýdentteriniń qatysýymen «Jyr kerýeni» atty leksııa-konsert ótti.
Bul shara «Halyq qazynasy» ǵylymı-zertteý ınstıtýtynyń qazaq halqynyń dástúrli mýzykalyq ónerin jańǵyrtý men nasıhattaýǵa arnalǵan «Dástúrli mýzykalyq mura» atty baǵdarlamasy aıasynda tuńǵysh ret uıymdastyrylyp otyr. Mamandar jyraýlyq dástúrdiń tarıhy Kúltegin, Tonykók, Orhon Enıseı jazýlarynan, Estemis, Bumyn qaǵandarǵa arnalǵan madaq jyrlarynan bastaý alatynyn alǵa tartady. О́ıtkeni, mundaǵy sóz tirkesteri, madaqtar jyraýlyq mekteptiń birneshe ǵasyrlyq shejiresin minsiz aıǵaqtaıdy. Munan keıingi kezeńderde ótken Qorqyt ata, Sypyra jyraý, Ketbuǵa, Asan qaıǵy, Shalkıiz, Dospambet, Qaztýǵan, Úmbeteı, Buqar jyraýlardyń jaýharlary kósh izin úzbeı jalǵastyrady.
Bir ǵajaby, jyraýlar sóziniń qudireti bıik rýhqa, qaırat-jiger men ǵalamat kúshke ıe. Olardy kisi jaı tyńdap qoıa salmaıdy. Qulaqqa quıyla bastaǵannan adam otqa qyzynǵandaı áserlenedi. Shabyt shaqyrady. Úreı, kúdikten aryltady. Ǵajaıyp sezimmen serpiledi. О́ıtkeni, jyraýlar qaı kezde de eń aldymen, eldiń muń-sherin, arman-maqsatyn esh búkpesiz ashyq aıta alyp otyrǵan. Ol da bolsa Uly Dala mádenıetiniń tek ózine ǵana tán bolyp keletin ereksheligi. Búgingi tańda jyraý babalarymyzdyń muralary men marjan oılary arqyly tarıhı sanany oıatýǵa, jyrlardy qalyń kópshilikke nasıhattaýǵa barynsha kóńil bóline bastady. Ulttyq mýzeıde Qazaqstannyń eńbek sińirgen qaıratkeri, Qazaq Ulttyq óner ýnıversıtetiniń professory, «Parasat» ordeniniń ıegeri, belgili kúmiskómeı jyraý Almas Almatovtyń júrgizýimen ótken Ulttyq mýzeıdegi leksııa-konsert sondaı ıdeıany júzege asyrýshy birden-bir joba bolyp tabylady.
Qarshyǵa KÚLEN.