Qazaqstan Jazýshylar odaǵy jyr alybynyń 170 jyldyq mereıtoıynyń qarsańynda «Jambyl aılyǵyn» jarııalady
Ústimizdegi jyldyń aqpan aıynyń 28-inde Qazaqstan halqy jyr alyby Jambyldyń 170 jyldyǵyn toılaıdy. Osyǵan oraı Qazaqstan Jazýshylar odaǵynda «Jambyl aılyǵy» bastalyp, jýrnalısterge arnalǵan alǵashqy baspasóz máslıhaty ótti.
Jınalysty júrgizgen jazýshy, jambyltanýshy ǵalym Naǵashybek Qapalbekov aılyq kezinde respýblıkamyzdyń túkpir-túkpirinde uıymdastyrylatyn ıgi sharalardyń – uly aqynnyń murasyn zertteý, zerdeleý baǵytyndaǵy túrli keshter men ǵylymı konferensııalardyń, sımpozıýmdar men án-jyr keshteriniń baǵdarlamasy týraly aıtyp berdi.
Al óz sózin:
– Jambyl meniń óz atym,
Halyq – meniń shyn atym, – degen uly aqynnyń jyrymen bastaǵan Qazaqstan Jazýshylar odaǵy basqarmasynyń tóraǵasy, senator Nurlan Orazalın mereıtoıdyń Qazaqstan Jazýshylar odaǵynda «Jyry álemdi sharlaǵan» atty sazdy-keshten bastalýynyń jaıdan-jaı emestigine toqtaldy. «О́ıtkeni, aqyndyq ónerimen álemdi jaýlap alǵan Jambyl esimi eshqandaı da tanystyrýdy qajet etpeıtin fenomen qubylys», dedi tebirene sóılegen aqyn-senator Nurlan Orazalın.
Elordamyz Astanada «Jambyl aılyǵynyń» aıasynda da aqpannyń 18-i kúni «Jyr alybyna taǵzym» atty ádebı sazdy kesh ótedi.
Jazýshylar odaǵynyń úlken zalynda aqyndar jyrdan shashý shashty. Ataqty «Súıinbaı sazy» ansambli konsert qoıdy.
Talǵat SÚIINBAI,
«Egemen Qazaqstan».
ALMATY.