ASTANA. 31 qańtar. Áýesqoı boksta el namysyn qorǵaǵan asa aýyr salmaqtaǵy boksshy Rýslan Myrsataev kásipqoı rıngtegi alǵashqy kezdesýin ótkizip, tehnıkalyq nokaýtpen jeńiske jetti. Bul týraly egemen.kz tilshisi habarlady.
Myrsataev kásipqoı bokstaǵy debıýttik jekpe-jeginde reseılik Valerıı Zamıralovpen synǵa túsip, birinshi raýndta-aq qarsylasyn nokaýtqa jiberdi.
Aıqastyń alǵashqy sekýndtarynda Zamıralov joıqyn soqqylarymen shabýyl jasap kórdi. Alaıda, qorǵanysta saýatty qımyldaǵan otandasymyz ózi de qarymta shabýyl uıymdastyrdy. Nátıjesinde reseılik aıaǵynan jaraqat alyp, tóreshiler jekpe-jekti toqtatýǵa májbúr boldy.
Boks keshi BM Global jáne Diamond Ring JShS-leriniń, sondaı-aq, Qazaqstan kásipqoı boks federasııasynyń uıymdastyrýymen keshe Almatydaǵy Royal Tulip qonaq úıinde ótti. Rýslannan bólek, rıngke Aıdos Erbosynuly, Berikbaı Nurymbetov, Nursultan Qabdýlov jáne taǵy basqa qazaqstandyq boksshylar kóterildi. О́z kezeginde Aıdos Erbosynuly da reseılik Dmıtrıı Antıpovty birinshi raýndta nokaýtqa jibergenin atap ótken jón.
Aıta keteıik, Rýslan Myrsataev ulttyq qurama sapynda 2008 jyly Qytaı astanasy – Beıjiń qalasynda ótken Olımpıalyq Oıyndarǵa qatysty. Odan bólek, ol «Astana arlandary» komandasymen birge Búkilálemdik boks serııasy saıysynyń chempıony atandy.
Elaman Qońyr.
Derek: egemen.kz.
Sýret: prosportkz.kz.