PETROPAVL. 1 aqpan. Qyzyljar óńirine issaparmen kelgen Qazaqstan Respýblıkasynyń Ishki ister mınıstrliginiń tótenshe jaǵdaılar komıtetiniń tóraǵasy Vladımır Bekker aımaq basshysy Erik Sultanovpen kezdesti. Kezdesý barysynda azamattyq qorǵaý salasyna qatysty mindetter talqylandy. Bul týraly oblystyq tótenshe jaǵdaılar departamentiniń baspasóz qyzmetine silteme jasaǵan egemen.kz tilshisi habarlady.
Komıtet tóraǵasy jedel-qutqarý jasaǵynyń qyzmetimen, vedomstvoǵa qarasty mekemelerdiń materıaldyq-tehnıkalyq bazasymen, tehnıkalyq jaǵdaıymen tanysty. Issapar baǵdarlamasyna sáıkes qalalyq mádenıet úıiniń akt zalynda oblys ákiminiń orynbasary Muhtar Mankeevtiń qatysýymen departamenttiń jumys qorytyndylary shyǵarylyp, aldaǵy mindetteri belgilendi. Aýmaqtyq organnyń jáne vedomstvoǵa qarasty mekemelerdiń qyzmetkerleri aldynda departament basshysy Pavel Fılıppov, sondaı-aq, qurylymdyq bólimsheler jetekshileri esep berdi.
Oblysta jaǵdaı baqylaýǵa alynǵan. Osyǵan baılanysty kórsetkish boıynsha, órt jaǵdaıy 5 paıyzǵa, tilsiz jaýdan qaza tapqandar 17 paıyzǵa, al zardap shekkender 24 paıyzǵa azaıǵan. Apattyq-qutqarý qyzmetteri órtterge, apattyq-qutqarý jumystaryna jáne ózge de qaýyrt jumystarǵa qarsy 2 myńǵa jýyq sharalar uıymdastyrǵan. 167 adam qutqarylyp, 265 adamǵa alǵashqy medısınalyq kómek kórsetilgen. Sondaı-aq, 800 mıllıon teńgeniń materıaldyq qundylyqtary saqtalynǵan.
О́mir Esqalı.
Derek, sýret: Soltústik Qazaqstan oblystyq tótenshe jaǵdaılar departamentiniń baspasóz qyzmeti.