«Nur Otan» partııasy Almaty qalalyq fılıalynyń belsendileri qalada partııanyń saılaýaldy shtaby ashylǵanyn habarlady
Partııanyń Almaty qalalyq fılıalynda ótken brıfıngte qalalyq saılaýaldy shtabtyń jetekshisi Rahman Alshanov ústimizdegi jyldyń 30 qańtarynda partııa Tóraǵasynyń birinshi orynbasary Asqar Myrzahmetovtiń jetekshiligimen Respýblıkalyq saılaýaldy shtabtyń ashylǵanyn atap ótip, Respýblıka boıynsha qalalyq jáne aýdandyq saılaýaldy shtabtar óz jumystaryn bastaǵanyn jetkizdi.
Osy is-shara aıasynda «Almaty qalalyq saılaýaldy shtabynyń quramyna tanymal tulǵalar, qoǵam qaıratkerleri, partııa belsendileri, qalalyq fılıal saıası keńesiniń músheleri, Qazaqstan halqy Assambleıasy etnomádenı birlestikteriniń jetekshileri men jastar uıymdarynyń belsendi ókilderi enip otyr.
Jýrnalıstermen ótken basqosý barysynda saılaýaldy shtab jumysynyń mindeti – «Nur Otan» partııasynyń parlamenttik jáne máslıhattar saılaýlarynda aıqyn jeńisine qol jetkizý ekendigi, partııanyń kezekten tys XVII sezinde Parlament Májilisiniń depýtattary saılaýyna arnalǵan partııalyq tizim bekitilgeni jáne jańa qabyldanǵan «Qazaqstan-2021. Birlik. Turaqtylyq. Jasampazdyq» atty saılaýaldy baǵdarlama aıasynda kóptegen is-sharalar atqarylýy tıis ekendigi atap kórsetildi.
Aıta ketsek, Almaty qalasy boıynsha senimdi ókilder men partııa belsendileriniń jumysyn úılestiretin 1 qalalyq jáne 8 aýdandyq saılaýaldy shtaby óz jumystaryn bastady. Olardyń quramynda 170 adam bar. Sonymen qatar, qala boıynsha saılaýaldy shtabtarynyń jumysyna 1500-ge jýyq senimdi ókil qatysady.
Qalalyq shtab jumysynyń ashylýyna «Nur Otan» partııasy Almaty qalalyq fılıaly tóraǵasynyń birinshi orynbasary Záýresh Amanjolova, «Nur Otan» partııasy fraksııasynyń Almaty qalasy máslıhatyndaǵy jetekshisi Murat Ádilhanov, Qazaqstannyń Eńbek Eri, belgili ustaz Aıagúl Mırazova, tanymal qarjyger Serik Ahanov, Olımpıada jeńimpazy, boksshy Ermahan Ybyraıymov «Lokomotıv» AQ fılıalynyń dırektory Bolat Ospanov, Qazaqstan halqy Assambleıasynyń músheleri men qalalyq jastar uıymdarynyń belsendileri qatysty.
Qanat ESKENDIR,
«Egemen Qazaqstan».
ALMATY.
Sýretti túsirgen
Iýrıı BEKKER.