Ortalyq saılaý komıssııasynyń keshegi otyrysynda Qazaqstan Respýblıkasy máslıhattarynyń depýtattyǵyna kandıdattardyń respýblıkalyq bıýdjet qarajatynan jabylatyn shyǵystarynyń mólsherleri bekitildi.
Qaýly jobasymen tanystyrǵan OSK tóraǵasynyń orynbasary Vladımır Foostyń aıtýynsha, elimizdiń «Saılaý týraly» konstıtýsııalyq zańyna sáıkes oblystyq, Astana jáne Almaty qalalyq máslıhattarynyń depýtattyǵyna tirkelgen árbir kandıdatqa bıýdjetten úgit sharalary men kóliktik shyǵystarǵa 245 myń teńge, al qalalyq jáne aýdandyq máslıhattar depýtattyǵyna kandıdatqa 153 myń teńge bólinedi. «Onyń ishinde oblystyq, Astana men Almaty qalalyq máslıhattary depýtattyǵyna kandıdattarǵa telearnalardan saılaýaldy baǵdarlamasymen tanystyryp, sóz sóıleý úshin 70 myń teńge, qalalyq jáne aýdandyq máslıhat depýtattyǵyna kandıdattarǵa 36 myń teńge qarastyryldy. Oblystyq, Astana men Almaty qalalyq máslıhattary depýtattyǵyna kandıdattarǵa radıolardan saılaýaldy baǵdarlamamen sóz sóıleýge 20 myń teńge, qalalyq jáne aýdandyq máslıhat depýtattyǵyna kandıdattarǵa 7 myń teńge bólinedi, – dedi OSK tóraǵasynyń orynbasary.
V.Foostyń atap ótýinshe, oblystyq, Astana men Almaty qalalyq máslıhattary depýtattyǵyna kandıdattarǵa basylymdarda eki maqala jarııalaý úshin 85 myń teńge, qalalyq jáne aýdandyq máslıhat depýtattyǵyna kandıdattarǵa 62 myń teńge qarastyrylǵan. «Oblystyq, Astana men Almaty qalalyq máslıhattary depýtattyǵyna kandıdattarǵa jarııa saılaýaldy sharalaryn ótkizýge jáne úgit-nasıhat materıaldaryn shyǵarýǵa 25 myń teńge, qalalyq jáne aýdandyq máslıhat depýtattyǵyna kandıdattarǵa 25 myń teńge bólinedi. Oblystyq, Astana men Almaty qalalyq máslıhattary depýtattyǵyna kandıdattardyń kólik shyǵystaryna 45 myń teńge, qalalyq jáne aýdandyq máslıhat depýtattyǵyna kandıdattarǵa 20 myń teńge qarastyrylǵan», – dedi ol osy jóninde.
Otyrysta, sondaı-aq, Astana men Shyǵys Qazaqstan oblystyq saılaý komıssııalarynyń jańa músheleriniń taǵaıyndalǵany habardar etildi. OSK múshesi Marat Sársembaevtyń aıtýynsha, Astana qalalyq saılaý komıssııasynyń shyǵyp qalǵan múshesiniń ornyna Aleksandr Shefer, Shyǵys Qazaqstan oblystyq saılaý komıssııasynyń shyǵyp qalǵan múshesiniń ornyna Vladımır Pak taǵaıyndalǵan.