О́tken aptada «Nur Otan» partııasynyń XVII sezinde «Qazaqstan - 2021. Birlik. Turaqtylyq. Jasampazdyq» jańa saılaýaldy baǵdarlamasy qabyldandy. Bul qujat bes ınstıtýttyq reformany júzege asyrý aıasyndaǵy «100 naqty qadam» Ult Josparynyń negizgi baǵyttary eskerile otyryp ázirlengen. Qazaqstan Prezıdenti janyndaǵy Ortalyq kommýnıkasııalar qyzmetinde ótken baspasóz máslıhatynda Senat depýtaty, Qazaqstan Jazýshylar odaǵynyń tóraǵasy Nurlan Orazalın osyǵan oraı óz oı-pikirimen bólisti.
«Dúnıe tynyshsyz, osy tynyshsyz dúnıeniń keńistiginde Qazaq eliniń tynyshtyǵyn saqtap, onyń táýelsizdik murattaryn qorǵaý – árbir qazaqstandyqtyń basty paryzy. «Nur Otan» partııasynyń XVII sezinde Elbasymyz osy máselege qatty nazar aýdardy jáne bes halyqtyq reformanyń jaı-japsaryn taǵy da tereńdetip, jurtshylyqty jumyspen qamtamasyz etý, sondaı-aq, syrtta júrgen qarjyny zańdastyrý sekildi birtalaı máselelerdi taldaı otyryp, Joldaýdaǵy halyqqa arnalǵan pármendi usynystar aıasyn taǵy da keńeıtti. Mine, osylaısha, óz sózin qazaqstandyqtarǵa óte jetimdi túrde arnady. Men baıandamany tyńdaý barysynda kókiregime túıgen máselege toqtalǵym keledi. Jemqorlyqqa qarsy qazir halyqty erekshe tolǵandyrady. Mine, osy máselege Elbasy jaqsy toqtaldy. Syrtta esepsiz júrgen qarjyny zańdastyrýǵa zor múmkindik berilip otyr. Shetelderdegi shottarda jatqan aqshany halyqtyń muqtajyna, qajetine jaratýǵa shaqyrdy», – dedi N. Orazalın.
Sonymen qatar, ol partııa sezinde bes ınstıtýttyq reforma qalaı atqarylatyny jete zerdelengenin, osyǵan oraı, qazirgi kezeń úlken mindetter júkteıtinin jetkizdi. «Jaýapty kezeńde bir atanyń balasyndaı jumylyp, múddemizdi, táýelsizdigimizdi saqtaýdyń, qorǵaýdyń jańa kezeńine ótip otyrmyz», – dedi N.Orazalın. Sóziniń qorytyndysynda, senator saılaýaldy baǵdarlamada búkil álemdi sharlaǵan ekonomıkalyq qıyndyqtardan shyǵýdyń joldary qórsetilgenine, olar halyqqa jan-jaqty túsindirilgenine toqtala kele, Parlament Májilisine tájirıbeli, bilikti azamattar saılanýy qajettigin atap kórsetti.
Láıla EDILQYZY,
«Egemen Qazaqstan».