Týma talant ónerimen tánti etti

Jambyl atyndaǵy Qazaq memlekettik fılarmonııasynyń konsert zalynda jas talant, halyqaralyq baıqaýlardyń laýreaty, 100-den asa mýzykalyq týyndylardyń avtory, vırtýoz pıanınoshy Rahat-Bı Ábdisaǵın jeke konsertin berdi. Týǵan jerinde tuńǵysh ret avtor­lyq keshin ótkizip otyrǵan Rahat-Bı jas ta bolsa, alys-jaqyn shet elderge keńinen tanylyp úlgergen asa talantty kompozıtor hám mýzykant. On alty jasynda Eýropa men Azııanyń aldyńǵy qatarly sahnalarynan týyndylary oryndalyp júrgen jas kompozıtorǵa degen qurmeti bolsa, kerek, 2013 jyly Parıj­de ótken fransýzdyń áıgili kompozıtory Erık Satıge arnalǵan mádenıet kúnderiniń ashylý saltanatyn Rahat-Bıdiń «Aport pour Satie» atty týyndysymen avtordyń oryndaýynda bastap, ol týraly Batys baspasózi «qolyna ónerdiń kıesi qonǵan qazaqtyń ǵajaıyp talantty uly» dep jarysa jazdy. Mektep tabaldyryǵynda júrgen kezinde Rahat-Bı Ábdisaǵın Qazaq ulttyq óner ýnıversıtetinde, Qur­manǵazy atyndaǵy Qazaq ulttyq konservatorııasynda, Nazarbaev Ýnı­versıtette, Italııanyń Santa-Che­chılııa akademııasynda jáne Alma­­tydaǵy Oqýshylar saraıynda «Mý­zyka joly» atty konsert-leksııa ótkizip, ónersúıer qaýymnyń shynaıy yqylasyna bólengen edi. 2015 jyly Dástúrli mýzykanyń halyqaralyq keńesine múshe bolyp, Dástúrli mýzykanyń dúnıejú­zilik konferensııasyndaǵy eń jas lektor retinde moıyndalyp, «Gar­monııa shegi», «Matematıka jáne zamanaýı mýzyka», «Zamana tur­ǵysyndaǵy etnos» dep atalatyn mýzykatanýshylarǵa arnalǵan birne­she ǵylymı eńbekterimen álem­dik óner maıtalmandarynyń arasynda tanymal bola tústi. О́ziniń avtorlyq keshin jas pıa­nıst «Jyl qustarynyń saryny» atty týyndysymen ashty. 2013 jyly Iаltada ótken A.Spendııarov atyndaǵy III Halyqaralyq kompozıtorlar baıqaýynda I oryn ıelengen bul týyndy týraly avtordyń ózi: «Adam qolymen talqandalǵan jerge jyl qustary qona almaýy – Tabıǵattyń janaıqaıy. Tirshilik úshin bar jaǵdaı jasalǵan ómirdiń tabıǵı terbelisin, jarasymdylyǵyn adam qolymen buzý – qylmys. Men osyndaı búgingi ómirdiń keleńsizdigin mýzyka tilimen, qustardyń únimen jetkizýge tyrys­tym» deıdi. Tek óz týyndylaryn ǵana emes, álemge áıgili Mosart, Shopen se­kildi uly kompozıtorlardyń da shy­ǵarmalaryn joǵary dárejede oryn­daıtyn Rahat-Bı Venesııada ıtalıandyq orkestr men dırıjer Petro Perınıdiń súıemeldeýimen qaıtalanbas konsert berip, osy óneri úshin halyqaralyq dıplomǵa da ıe bolǵan. Rahat-Bıdiń «Qazaq rapsodııasy» atty týyndysy dúnıejúzilik «Discography» mýzyka toptamasyna en­gizilip, osydan týra 30 jyl buryn Ǵazıza Jubanova men Serik Erkimbekov jáne Tiles Qajyǵalıevt­iń týyndylarynan keıin úzilip qalǵan álemdik kóshtegi qazaq óneriniń arqaýyn jańǵyrtty. Jas talanttyń «О́mirge talpynys» («The Will to Live») atty shyǵar­masy álemdik dárejede keńinen nasıhattalǵan birtýar óner týyndysy. 2015 jyly Berlın fılarmonııasynda oryndalǵannan keıin bul shyǵarma Ispanııanyń Alıkante, Telýade se­kil­di óner astanalarynda nasıhattalyp, kúlli álemge jol tartty. Osy qaıtalanbas týyndysymen Rahat-Bı Ábdisaǵın óziniń avtorlyq keshin túıindep, Qazaqstan Respýblıkasy Memlekettik akademııalyq orkes­triniń súıemeldeýimen qalyń tyńdar­manyn óz ónerine sýsyndatty. Jas ta bolsa álemdik deńgeıde tanylyp, ultymyzdyń mýzyka ónerin nasıhattap júrgen Rahat-Bıdiń avtorlyq keshinde orkestrge Qanat Oma­rov kórkemdik jetekshi bolsa, al Erbolat Ahmedııarov dırı­jer­lik qoldaý kórsetip, ónerdegi jara­sym­dylyqtyń jalǵasatynyn tanytty. Qanat ESKENDIR, «Egemen Qazaqstan». ALMATY. Sýretti túsirgen Nurmanbet Qızatov.