baýyr aýystyrý otasy sátti jasaldy
О́tken jyly kúzde QR Ulttyq medısına ortalyǵy janyndaǵy respýblıkalyq transplantologııa ortalyǵynyń basshysy, akademık, medısına ǵylymdarynyń doktory Jaqsylyq Dosqalıev oblystyq klınıkalyq aýrýhana bazasynda búırek aýystyrý operasııasyn jasap, BAQ ókilderimen bolǵan brıfıngte 2016 jyly munda baýyr aýystyrý otasy jasalatynyn aıtqan bolatyn. Mine, bul sát te jetti.
Batys aımaǵynda alǵash ret Aqtóbede baýyr aýystyrý operasııasy jasaldy. Ońtústik Koreıanyń Seýl ulttyq ýnıversıtetinen kelgen Kvang Výng Lı jáne akademık Jaqsylyq Dosqalıev bastaǵan aqtóbelik bilikti hırýrgter 38 jastaǵy áıeldiń baýyryn aýystyrdy. Operasııa 7 saǵatqa sozyldy. Naýqastardyń jaǵdaıy jaqsy. Bul týraly oblystyq aýrýhanada ótken baspasóz máslıhatynda habardar etildi.
Baýyr aýystyrý otasy buǵan deıin Astana, Almaty jáne Shymkent qalalarynda jasalyp kelgen eken. Stýdentter men dárigerler baýyr aýystyrý sátin májilis zalyndaǵy ekrannan kórdi.
Derti dendegen áıel buǵan deıin dári-dármektiń kúshimen ómir keshken. Oǵan týǵan inisi baýyryn berýge keliskennen keıin Seýl ýnıversıtetiniń dárigerlerimen birlese otyryp, apaly-inili ekeýine medısınalyq tekserý júrgizilgen. Bazylbek Jaqıev, Ábilǵazy Janádil, Murat Jaıqanov syndy aqtóbelik dárigerler men medbıkeler sol elge baryp tájirıbeden ótip kelgen. Qazir eki adamnyń da jaǵdaıy qalypty. Ońtústik Koreıadan kelgen professor Kvang Výng Lıdiń aıtýynsha, baýyry almastyrylǵan áıel áli de úsh aptadaı aýrýhanada jatady. Al týǵan ápkesine baýyrynyń 70 paıyzyn bergen jigit bári sátti bolsa, 10 kúnnen soń úıine oralady. Dárigerlerdiń keńesterin múltiksiz oryndap, kútinip júrse, onyń aǵzasy aldaǵy 6 aıdyń ishinde tolyqtaı qalpyna keledi.
Oblystyq densaýlyq saqtaý basqarmasynyń basshysy Áset Qalıevtiń málimdeýinshe, bolashaqta oblysta transplantologııalyq ortalyq ashylady dep kútilýde. Sońǵy eki jylda bul maqsatqa 250 mıllıon teńge bólinip, kúrdeli operasııalarǵa qajetti qondyrǵylar satyp alynyp, dárigerler biliktiligin jetildirgen. Osy kezge deıin jasalǵan jeti búırek aýystyrý otasy sátti ótken.
Budan bylaı aqtóbelik dárigerler baýyr aýystyrý operasııasyn ózderi jasaıdy. Bıyl osyndaı 5 ota jasaý kózdelýde. Derekkózderinen málim bolǵanyndaı, jalpy oblysta 128 adam búırek, al 60 adam baýyr aýystyrýdy kútýde eken.
Satybaldy SÁÝIRBAI,
«Egemen Qazaqstan».
Aqtóbe oblysy.
Sýretti túsirgen
Haıredın Raýshanov.