Keshe «Nur Otan» partııasynyń Respýblıkalyq qoǵamdyq qabyldaý bólmesinde «Kásipkerlerge qamqorlyq» aksııasy sheńberinde «Kásipkerlerdi biryńǵaı qabyldaý kúni» aksııasy bolyp ótti. Shara barysynda osy salaǵa umtylys tanytyp júrgen azamattardyń suranys-tilekterine jaýap berý úshin «Kásipkerlikti damytý qory» AQ-tyń Astana qalasyndaǵy aımaqtyq fılıalynyń dırektory Islambek Qaıyrbekov qabyldaý ótkizdi.
Oǵan jeke bıznesin bastaýǵa jáne ári qaraı jetildirý úshin birqatar qoldaýdy qajet etetin kásipkerler ózderiniń buıymtaıyn aıta keldi. Olardyń arasynda óziniń bıznes mektebin ashqysy keletinder, tigin sheberhanasyn keńeıtip, arnaıy tehnıkalyq jaraqtardy satyp alýǵa jáne keńselerdi jalǵa alý úshin qarajat qarastyrý boıynsha keńes suraı kelgender de bar. Bul rette, qabyldaýǵa kelgen G.Taneke, S.Toqqazyuly jáne A.Musabekov sekildi kásipkerler «Bıznestiń jol kartasy-2020» memlekettik baǵdarlamasy aıasynda jumystaryn jandandyrýǵa qandaı múmkindik bar ekendigine qanyq boldy.
Qabyldaý sheńberinde shaǵyn jáne orta bıznes baǵdarlamasynyń negizgi tetikteri, onyń sharttary men mindetteri, atalǵan baǵdarlamany júzege asyrý barysynda kóterilgen problemalardy sheshý joldaryn izdeý jáne bıznesti qarjylandyrýǵa qoljetimdilikti arttyrý, ekinshi deńgeıli bankterdiń nesıeleri boıynsha syıaqy tóleý júktemesin azaıtý, kásipkerlerdi oqytý jáne bıznes-josparlaryn jasaý týraly aqparattar keńinen aıtyldy.
Jeke bıznesin bastaýǵa nıetti Aqlıma Qusaıynova óziniń psıhologııa salasynda kóp jyldyq eńbek ótili bar ekendigin jáne shetelde taǵylymdamadan ótken maman retinde rýhanı bilim berýden bastap kásipkerliktiń qyr-syryn úıretetin óziniń avtorlyq mektebin ashýǵa qarjylaı kómek qajettigin jetkizdi. Bul máselede jeke kásipkerge mamandar tarapynan baǵyt-baǵdar berildi. Endigide «Bıznestiń jol kartasy-2020» baǵdarlamasyndaǵy talaptar negizinde kómek kórsetiletin bolady.
Jalpy alǵanda, joǵaryda aıtyp ótkenimizdeı, «Bıznestiń jol kartasy-2020» baǵdarlamasynda belgilengen kórsetkishterge laıyq bolǵan adamdar bıznes bastaýǵa memlekettik kómek ala alady. Aıtar bolsaq, kásipkerler 16 paıyzben nesıe alatyn bolsa, onyń 7 paıyzyn memleket ótep, qalǵan 10 paıyzyn kásipker tólese, kerisinshe, aýyldy jerlerde, aýdandar men monoqalalarda bıznes tizginin qolǵa alǵandar úshin 16 paıyzdyq nesıeniń 10 paıyzyn memleket sýbsıdııalaıdy. Sonymen qatar, kepildeme máselesi de ońtaıly jolǵa qoıylyp otyr.
Aksııaǵa qatysýshy kásipkerlerdiń suraqtaryna naqty ári tolyqtaı jaýap berilip, olar aldaǵy jumysyna baǵdar aldy. Osylaısha qarqyndy túrde keńes berý sharasyn ótkizgen «Kásipkerlikti damytý qory» AQ ótken jyly partııanyń barlyq aımaqtyq jáne aýmaqtyq fılıaldarynda kásipkerlik máselesi boıynsha 2 myńnan astam azamatty qabyldaǵan. Al bıylǵy jyldyń ózinde qańtar aıynyń ishinde 150-den astam azamat keńes berý jumysymen qamtylǵan.
Sonymen qatar, ótken jyldyń 13 naýryzy men 11 qyrkúıeginde «Myqty bıznes – qýatty memleket» aksııasy aıasynda «Nur Otan» partııasynyń barlyq qoǵamdyq qabyldaý bólmelerinde «Bıznestiń jol kartasy-2020» baǵdarlamasyn júzege asyrý boıynsha «Azamattardy biryńǵaı qabyldaý kúni» aksııasy ótken bolatyn. Atalǵan aksııaǵa bes myńnan astam azamat qatysty.
Elmıra MÁTIBAEVA,
«Egemen Qazaqstan».