«Aq jol» demokratııalyq partııasynyń bas keńsesindegi ótken qoǵamdyq qabyldaýǵa túıtkildi máseleniń túıinin tarqata almaı júrgen jandar jınaldy dese bolǵandaı. Kerenaý keńselerdiń tabaldyryǵyn tozdyryp, quzyrly organdarǵa jazǵan shaǵymdarynan oń nátıje shyqpaǵan soń, aryz-armanyn arqalap, úkili úmittiń jeteginde «Aq jolǵa» kelgen.
Seksenniń seńgirine shyqqan Qorǵan Ámirhamzın aqsaqal qorǵansyzdyqqa kúıinip, endigi bar úmiti Azat Perýashev basqaratyn partııaǵa tirelgenin kemseńdeı otyryp jetkizdi. Ashpaǵan esigi, barmaǵan keńsesi qalmapty. Aqsaqaldyń aıtýynsha, kómir tasymalymen aınalysatyn ulyn Aqmola oblysyndaǵy Selınograd aýdany ákimdiginiń qyzmetkerleri taqyrǵa otyrǵyzypty. Osydan eki jarym jyl buryn ákimdiktiń jylý qazandyǵyna jetkizilgen kómirge tıesili tólemniń 1 mıllıon teńgesi ǵana tólenip, 9 mıllıon 500 myń teńgesin áli kúnge deıin ala almaı júr eken. Aýdandyq ákimdik qyzmetkerleriniń ádiletsizdiginen búginde aqsaqaldyń balasy aýrýǵa shaldyǵyp, jumyssyz qalǵan kórinedi.
Jetimder úıiniń tárbıelenýshisi Galına Kıl de «jetimdi jebeıtin uıym» retinde Qoǵamdyq qabyldaýǵa senim artyp kelipti. Ol qazir úsh balasymen barakta turyp jatyr eken. Astana qalalyq ákimdiginiń turǵyn úı basqarmasyna barsa, turǵyn úı kezegine tirkeý týraly ótinishin qabyldamaǵan. Endi aqjoldyq zańgerler G.Kılge turǵyn úı kezegine turý úshin keńes berip, qujattaryn ázirleýge kómektesetin bolady.
Al «Ortopedııa akademııasy» JShS-niń bas dırektory Inna Kamalova bolsa, Qoǵamdyq qabyldaýǵa jeke basynyń qamymen emes, eldiń múddesine oraılasatyn arnaıy usynysymen kelipti. «Biz tirek-qımyl apparaty aýrýlaryn, ıaǵnı maıtaban, ókshe, dene turqynyń búgilýi degen sııaqtylardy emdeýmen aınalysamyz. Biz buryn ónimderdi Reseı, Eýropa, Qytaı tárizdi elderden ákeletinbiz. Al qazirgideı ekonomıkalyq qıyn kezeńde syrttan tasymaldanatyn taýarlardyń baǵasy sharyqtap ketti. Satyp alý qabileti tómendegen soń, atalǵan ónimder arqyly em qabyldaý tutynýshyǵa tıimsiz. Sol sebepti, otandyq óndiristi iske qosý tóńireginde oıǵa keldik. Al óndiriske qajetti shıkizat ta elimizde óndirilmeıdi. Syrttan tasymaldaǵan kúnde onyń ózindik quny taǵy da ósip shyǵa keledi. О́ndiriske qajetti sapaly bylǵaryny shyǵarý úshin júzdegen mıllıon dollar kóleminde qarjy kerek. Orta bıznes úshin bul – qol jetpeıtin ınvestısııa. Eger de memleket tarapynan osyndaı óndiris qolǵa alynyp, daıyn ónimine deıin elimizde shyǵarylatyn bolsa, biz, shaǵyn jáne orta bıznes ókilderi ımport almastyrý baǵdarlamasyna ózimiz de úlesimizdi qosqan bolar edik», deıdi Inna Vladımırovna.
«Aq jol» partııasy tarapynan qoǵamdyq qabyldaýlar ár apta saıyn ótkizilip turady. О́tken shaqyrylymda partııa fraksııasynyń músheleri azamattardyń talap-tilekterine baılanysty Úkimetke, Bas prokýratýraǵa jáne de basqa da quzyrly organdarǵa 190-nan astam depýtattyq saýal joldaǵan. Tórt jylǵa jýyq ýaqyttyń ishinde Qoǵamdyq qabyldaýda uzyn-sany 2000-ǵa jýyq adam bolǵan.
Qoǵamdyq qabyldaý tóńiregindegi oıyn partııanyń tóraǵasy Azat Perýashev tómendegishe tarqatty: «Parlamenttik partııa bolǵan soń azamattardyń ótinishterimen jumys isteýge mindettimiz. Azamattardan túsetin aryz-shaǵymnyń denin jer telimi, turǵyn úı, ıpotekalyq nesıe, úleskerler problemasy quraıdy. Jumyssyzdyq máselesi de aldyńǵy qatarda. Kásipkerlikpen aınalysatyn orta bıznestiń ókilderi de ózderiniń talap-tilekterin jetkizedi. Nemese memlekettik satyp alýǵa qatysty zańsyzdyqqa kezikken, tekserýshi organdar tarapynan qysymǵa ushyraǵan azamattar da qabyldaýǵa jıi keledi. Partııanyń qoǵamdyq qabyldaýyna kelgen azamattardyń shaǵymyna qatysty tıisti organdarǵa hat joldap qana qoımaı, qajetti jerinde zańgerlerimiz olardyń quqyǵyn sot organdarynda qorǵaýǵa da kómektesedi», dep sózin túıindedi Azat Turlybekuly.
Qoǵamda túıini tarqatylmaǵan másele barshylyq eken. Qoǵamdyq qabyldaýǵa kelgen azamattardyń aryz-shaǵymynan osyny paıymdadyq. Atqarýshy, sot bıligi sııaqty quzyretti organdardyń qyzmetiniń olqy tustary osyndaıda kórinip qalady. Nátıjeli bolsa, jemisti bolsa, el-jurttyń partııalarǵa aryzdanatyndaı nesi bar?!
Ǵabıt ISKENDERULY,
«Egemen Qazaqstan».