ALMATY. 5 aqpan. Ábilhan Qasteev atyndaǵy Qazaqstan Respýblıkasynyń memlekettik óner murajaıynda «Babalar ańsaǵan Táýelsizdik» atty ulttyq baıqaý jarııalandy. Bul týraly memlekettik murajaıdyń baspasóz ortalyǵyna silteme jasaǵan egemen.kz tilshisi habarlady.
Baıqaý Qazaqstan Respýblıkasy Táýelsizdiginiń 25 jyldyǵyna arnalǵan jáne «Máńgilik el» ulttyq ıdeıasy qundylyqtaryna sáıkes birtutas mádenı keńistik qalyptastyrýǵa baǵyttalǵan.
Baıqaý sýretshilerge Qazaqstan mádenıeti men Qazaqstan beıneleý óneriniń tarıhyna óziniń jeke salmaqty úlesin qosýyna jáne ónerdiń jetekshi janrlarynda keskindeme men músinniń qanat jaıýyna yqpalyn tıgizedi. Sondaı-aq, keler urpaqqa elimizdiń basty kórkemdik ordasynda máńgilik saqtalatyn, kórnekti týyndy qaldyrýyna zor múmkindik ashyp berdi.
Mádenı sharanyń maqsaty men mindetteri – memleketimizdiń mańyzdy tarıhı oqıǵalary men tulǵalaryn kórkemdik-beınelik kórinisterdi zerdeleý jáne olardy berý tásilderi arqyly patrıottyq tárbıege yqpal etý. Sýretshiler arasynda báseke týdyryp, beıneleý óneri sheberleriniń kásibı kórkemdik deńgeıin kóterip, jetildirý jáne álem óneri tarıhyndaǵy mańyzdy janrlardyń biri tarıhı janrdyń odan ári damýyna qozǵaý salý.
Baıqaý shartyn baspasóz konferensııasynda Ábilhan Qasteev atyndaǵy Qazaqstan Respýblıkasynyń memlekettik óner murajaıynyń dırektory, professor G.K. Shalabeva tanystyrady. Ol shart Ábilhan Qasteev atyndaǵy murajaıdyń saıty men áleýmettik jelilerde qosymsha jarııalanady.
Baıqaý 2016 jyldyń 15 jeltoqsanda Ábilhan Qasteev atyndaǵy Qazaqstan Respýblıkasynyń memlekettik óner murajaıynyń zaldarynda Qazaqstan Táýelsizdiginiń 25 jyldyǵyna arnalǵan kórmemen aıaqtalady.
Talǵat Súıinbaı.
Derek, sýret: Ábilhan Qasteev atyndaǵy Qazaqstan Respýblıkasy memlekettik óner murajaıynyń baspasóz ortalyǵy.