ORAL. 31 qańtar. Batys Qazaqstan oblysynyń ortalyǵy – Oral qalasyndaǵy qalalyq mádenıet jáne demalys saıabaǵynda Táýelsizdiktiń 25 jyldyǵyna oraı dástúrli buqaralyq shańǵy jarysy ótti. Bul týraly inform.kz-ke silteme jasaǵan egemen.kz tilshisi habarlady.
Sharaǵa qatysqan oblys ákimi Nurlan Noǵaev óńirde Elbasy tapsyrmasyna sáıkes qalyń buqarany sportpen aınalysýǵa keńinen tartý maqsatynda jazda jeńil atletıka, velosıped, qysta shańǵy jarystary udaıy uıymdastyrylyp turatynyn aıtty. Onyń aıtýynsha, oblystyq dene shynyqtyrý jáne sport basqarmasy uıytqy bolǵan bul jolǵy shara bıyl jazda Rıo-de-Janeıroda ótetin HHHI jazǵy Olımpıada Oıyndarynda óner kórsetip, el namysyn qorǵaıtyn sportshylardy qoldaýǵa arnaldy.
Uzyndyǵy 3 shaqyrym bolatyn shańǵy jarysyna túrli mekemeler, oqý oryndary, sport mektepteri, sondaı-aq, qala turǵyndary, barlyǵy 2 myńdaı adam qatysty. Erekshe belsendilik kórsetkender dıplomdarmen, baǵaly syılyqtarmen marapattaldy.
Temir Qusaıyn.
Derek, sýret: inform.kz.