memlekettiń qoldaýy arqasynda atakásipti jandandyryp, ózgelerge úlgi bolyp otyr
Jarqyn – kúre joldan 20 shaqyrymdaı qashyqtyqta ornalasqan qazaq aýyldarynyń biri. Osyndaǵy júzge jýyq otbasynyń qaısysy bolsyn qosalqy sharýashylyqpen aınalysady. Solardyń qatarynda aǵaıyndy Ábdirahmanovtardy úlgi etýge bolady. Tepse temir úzetin úsh aǵaıyndy jigittiń búgingi tirligi jurt qyzyǵarlyqtaı. Dmıtrıev aýyldyq okrýgine qaraıtyn eldi meken ormandy alqaptarǵa, qunarly jaıylymǵa baı. Tórt túlik ósirýmen aınalysýshylarǵa taptyrmaıtyn qonys. Aǵaıyndy Baqyt, Murat jáne Baýyrjan Ábdirahmanovtar keıbir qatarlastary sııaqty qalaǵa umtylmaı, kerisinshe, on jyldan beri edilbaı qoıyn, iri qara maly men jylqy ósirip, mal asyldandyrý isine de jete kóńil bólip keledi. Sharýa qojalyǵyna otbasynyń kenjesi Baýyrjan jetekshilik etedi. Taıaýda «Mámbetov jáne K» komandıttik seriktestiginen 2 bas asyl tuqymdy angýs buqasyn satyp alypty. Ondaǵy oılary – etti baǵyttaǵy mal sanyn kóbeıtý.
Aǵaıyndy jigitter Aýyl sharýashylyǵyn qarjylaı qoldaý qory arqyly 3,3 mılllıon teńge jeńildikti nesıege qol jetkizip, 22 bas qazaqtyń aqbas sıyryn, edilbaı qoılaryn, 5 mıllıon teńge ekinshi nesıege 35 bas jergilikti qara malyn ákelgen. Aýyl irgesinen 10 gektar jer jaıylym retin jalǵa berilgen. Ol mańaıǵa 70 basqa arnalǵan mal qorasy salynǵan.
– Jańa mal qorasyn kepildikke qoıyp, 7 jyl merzimge 4,8 mıllıon teńge nesıe resimdedik. Osy qarjynyń arqasynda tabynǵa 37 bas iri qara maly men 1 angýs buqasy qosyldy. Búgingi kúni fermamyzda iri qara malynan basqa 400 edilbaı qoıy, 30-dan astam jylqy ósiriledi. «Sybaǵa» baǵdarlamasy arqyly jaǵdaıymyzdy jaqsartyp aldyq. Endi sútti sıyr ósirýge qamdanyp jatyrmyz. Ol úshin «Peterfeld-Agro» JShS-niń sút fermasymen kelisimshart jasasyp qoıdyq, – deıdi Baýyrjan Sosıaluly.
Qazir sharýa qojalyǵynda 114 gektar egistik alqap, 269 gektar jaıylymdyq jer, «K-700», «MTZ-1221», «KÝN» qondyrǵysy ornatylǵan «MTZ-80» traktorlary, «Enıseı» kombaıny, alty tonnalyq tirkeme qorap bar. Is tetigin biletin kásipkerler mal azyǵyn daıyndaıtyn tehnıkany saqadaı-saı etip alǵan. Polshalyq rotorly shóp mashınasy men orama shóp taılaıtyn pressjınaǵysh Omby qalasynan qoljetimdi baǵaǵa satyp alynǵan. Qysqa 200 tonnadaı orama jemazyq ázirlenip, qystaqqa jetkizilgen. «Mal baqqanǵa bitedi» degen ras.
– Aýyldyqtardyń negizgi kúnkórisi – mal. Bala-shaǵanyń nápaqasyn osylaısha mańdaı termen aıyryp otyrǵan jaıymyz bar. Tań atqannan kún batqanǵa deıin maldyń sońynda júremiz. Aýyldan eki baqtashy jaldap, aı saıyn eńbekaqy tóleımiz. Bıyl júzshaqty qoıdy soıyp, bazarǵa ótkizý nıetindemiz. Tek qoılardyń terisi men júnin iske asyra almaı, qınalyp otyrǵan jaıymyz bar. Eshkim almaıdy. Sondyqtan dalaǵa shyǵaryp tastaýǵa májbúrmiz.
Eń bastysy, memlekettik satyp alý baǵdarlamasy boıynsha ár iri malyna 24 myń teńge kóleminde demeýqarjy beriledi. Bul – zor qoldaý. Soǵan oraı, tıisti qujattarymyzdy resimdep, 30-35 bas qashar men buqashyq ótkizýdi oılastyryp qoıdyq, – deıdi aǵaıyndy Ábdirahmanovtar.
Nursaıyn ShÁRIP.
Soltústik Qazaqstan oblysy,
Tımırıazev aýdany.
Sýrette: B.Ábdirahmanov.
Sýretti túsirgen Talǵat TÁNIBAEV.