PAVLODAR. 9 aqpan. Ekibastuzdaǵy qurylysy 2009 jyldyń qazan aıynda bastalǵan tehnıkalyq jáne kásiptik mamandar daıarlaý jónindegi óńiraralyq ortalyqqa respýblıka bıýdjetinen 4,5 mlrd. teńge bólingen-di. Alaıda, jeti jylǵa jýyqtaǵan qurylys áli aıaqtalmaı keledi. Bul týraly egemen.kz tilshisi habarlady.
Atalǵan ortalyqqa tapsyrys berýshi – Bilim jáne ǵylym mınıstrligi. Jospar boıynsha keshenniń qurylysy 17 aıda bitý kerek bolatyn. Iаǵnı, bilim berý mekemesi 2010 jyldyń sońynda aıaqtalýǵa tıis-ti. Degenmen, Ekibastuzdaǵy alyp ortalyqtyń qurylysy kúni búginge deıin tolyq bitpeı keledi.
Orta jolda toqtap qalǵan ǵımarattyń tómengi qabattary sýǵa tolyp ketken. Joba boıynsha ortalyq 14 bólikten, ıaǵnı, 14 jeke ǵımarattan turady. Árqaısysy 240 oryndyq eki jataqhana, 100 oryndy qonaq úı, sport ǵımaraty, ákimshilik korpýsy, 3 oqý ǵımaraty, 2 sheberhanasy bar. Aldyn ala josparda 700 oqýshy bilim alýy tıis.
Mamandar óńirlik damý mınıstrliginiń sheshimimen qurylys jumystary toqtatylǵanyn aıtty. Qazir ol jerde kúzetshiler ǵana júr. Eshkim eńbek aqy tólemeıdi, kúzetshiler keshendi tastap ketpekshi.
«Jalpy, mıllıardtaǵan qarjyny dalaǵa ushyryp, ortalyq salýdyń qandaı qajettiligi bar? boldy?» – deıdi ekibastuzdyqtar.
Farıda Byqaı.
Derek, sýret: egemen.kz.