О́tinish-tilekter eskeriledi

Keshe «Birlik» saıası partııasynyń respýblıkalyq qoǵamdyq qabyldaý bólimi ashyldy. Dál osyndaı qabyldaý bólimderi elimizdiń barlyq aımaqtarynda jumys isteı bas­taıtyn bolady. Bul jerlerde saılaýshylardyń partııa, partııalyq tizim boıynsha Parlament Májilisine usynylǵan kandıdattar týraly málimet alyp, olardyń qoǵam ómiriniń barlyq salasyna qatysty suraqtaryna jaýap berýge tolyq múmkindik jasalǵan. Bul kúni Respýblıkalyq qoǵamdyq qabyldaý bólimine kelgen azamattardyń keıbiri, birinshi kezekte, «Birlik» partııasynyń saılaýaldy baǵdarlamasyn bilgisi kelse, endi birin saılaýshylardyń quqyǵy men mindetteri qandaı degen másele qyzyqtyrdy. Sonymen qatar, kelýshilerdiń barlyǵy «Birlik» partııasynyń elimizdegi basqa saıası kúshterden aıyrmashylyǵy qandaı degen saýal­daryn qoıyp jatty. Osyǵan oraı, partııa músheleri kelýshilerdiń suraqtaryna tolyq jaýap berip, quqyqtyq má­selelerge baılanysty keńes berdi. Máselen, partııa tór­aǵa­synyń orynbasary Tólegen Qýanyshevtyń aıtýynsha, qoǵam­dyq qabyldaý bólmesi aldyn ala belgilengen ýaqyt aralyǵynda, ıaǵnı tańǵy saǵat 9-dan bastap, keshki saǵat 6-ǵa deıin qyzmet etetin bolady. «Biz bul jerde olardy tol­ǵan­dyratyn saýaldar boıynsha qabyldaýǵa daıynbyz. Kesheden beri Qaraǵandy, Aqmola oblys­tarynda ashyldy, basqa óńir­lerde de birtindep ashyla bas­tady. Saılaýǵa daıyndyǵymyz óte joǵary deńgeıde. Biz saılaý­shy­larǵa taratatyn qujattary­myzdyń mazmunyna aıryqsha mán beremiz. Olarda bizdiń maq­sattarymyzdyń sheshilý joldary aıqyn kórsetilgen», – dedi T.Qýanyshev. Al partııa múshesi Murat Raev qazirgi tańda saılaýaldy naý­qan­nyń qyzmetin quqyqtyq jaǵynan qamtamasyz etýge arnalǵan orta­lyq, jergilikti buqaralyq aqpa­rat quraldarymen baılanys júr­gizetin qyzmet júıesi quryl­ǵanyn, al jergilikti jerlerde par­­tııaǵa qatysty nasıhat jumys­tar­yn júrgizetin nasıhatshy top­­tar­dyń quryla bastaǵanyn jetkizdi. «Biz aqpan aıynyń 20-synan bastap, ıaǵnı resmı túrde saılaý­aldy naýqanymyzdy júrgizetin bolamyz», – dedi ol óziniń sózinde. Jalpy, qoǵamdyq qabyl­daý­dyń jumysy irkilissiz júrýi úshin arnaıy jumys kestesi jasalǵan eken. «Birlik» saıası partııasynyń qoǵamdyq qabyldaý bólimderi azamattardy saıası naýqan aıaq­tal­ǵanǵa deıin qabyldaıdy. Láıla EDILQYZY, «Egemen Qazaqstan». Astana.