Keshe Qazaqstan Kommýnıstik halyqtyq partııasy (QKHP) Ortalyq komıteti uıymnyń elektorattyq naýqanǵa daıyndyǵyn pysyqtaý maqsatynda aımaqtyq bólimshelerimen skaıp-konferensııa ótkizdi.
QKHP-nyń Pavlodar, Aqmola, Ońtústik Qazaqstan, Shyǵys Qazaqstan, Almaty, Qostanaı oblystary men Almaty qalasy fılıaldarynyń ókilderi qatysqan skaıp-konferensııada respýblıkalyq saılaýaldy shtabtyń jetekshisi Aıqyn Qońyrov uıymnyń aımaqtyq bólimshelerine aldaǵy elektorattyq naýqanǵa daıyndyqty bastaý týraly nusqaý berdi.
«Qazaqstan Kommýnıstik halyq partııasy aldynda mańyzdy ári jaýapty mıssııa tur. Biz óz jaqtastarymyzǵa partııamyzdyń maqsat-mindetterin óz deńgeıinde túsindirýimiz kerek. Sondyqtan, aldaǵy naýqanda Qazaqstan kommýnısteri ortalyqta jáne jergilikti jerlerde partııanyń saılaýaldy baǵdarlamasy aıasynda tıimdi jumystar atqarýy tıis», – dedi A.Qońyrov.
О́z kezeginde QKHP Ortalyq komıtetiniń hatshysy Turǵyn Syzdyqov: «Halyqqa bizdiń eldi jańǵyrtý, azamattyq qoǵamdy damytý, ekonomıkanyń sapaly transformasııalanýy jáne rýhanı qundylyqtarymyzdy saqtaý baǵytyndaǵy ustanymdarymyzdy jetkizý asa mańyzdy is», – dep málimdedi.
Sondaı-aq, konferensııa barysynda aldaǵy saılaýaldy úgit-nasıhat jumystary kezinde básekeles partııalardyń jumysyna kóbirek mán berý qajettigi de aıtyldy. Buǵan qosa, partııanyń úgit-nasıhat jumystary qoldanystaǵy zań talaptaryn qatań saqtaý arqyly júrgiziletini atap kórsetildi.
Sonymen birge, Vladıslav Kosarev te óńirlik bólimshelerdiń esebin tyńdap, saılaý naýqanynda qamtylýy tıis jumystar jóninde áńgimelep berdi.
Skaıp-konferensııa qorytyndysy boıynsha óńirlik saılaýaldy shtabtaryn qurý, senim bildiriletin adamdardy tańdaý, tirkeý, úgit-nasıhat toptaryn qalyptastyrý jáne olardy oqytý, eńbek ujymdarymen kezdesýler ótkizý, sondaı-aq, buqaralyq sıpattaǵy úgit-nasıhat sharalaryn uıymdastyrý týraly sheshimder qabyldandy.
Joldybaı BAZAR,
«Egemen Qazaqstan».
ASTANA.