«Aqmola medıa ortalyǵynyń» májilis zalynda Saılaýǵa baıqaý jasaý jónindegi Aqmola oblystyq fılıalynyń tóraǵasy Ǵosman Tóleǵul buqaralyq aqparat quraldary ókilderimen baspasóz máslıhatyn ótkizip, onda saılaý naýqanyna qoǵamdyq baqylaý jasaý tetigi jaıly aıtyp berdi.
Saılaý – saıası naýqan, onyń zań aıasynda ótýi demokratııalyq úderisterdiń ashyqtyǵyn kórsetedi. Bıylǵy Parlament Májilisi men jergilikti máslıhattar saılaýlary kezekten tys ótkeli otyrǵandyqtan, daıyndyq sharalary da qolǵa alyndy.
Ǵ.Tóleǵul óziniń sózinde saılaý barysyna qoǵamdyq baqylaý jasaýdyń mańyzdylyǵyna basa toqtaldy. О́rkenıetke umtylǵan elimizde ádil saılaý ótkizý memleketimizdiń de bedelin kóteretini anyq, dedi ol.
Jalpy, Aqmola oblysyndaǵy barlyq saılaý ýchaskeleri tolyǵymen qoǵamdyq baıqaýshylarmen qamtamasyz etilmekshi. О́tken prezıdenttik saılaýda oblys boıynsha barlyǵy 500-den asa baıqaýshy jumys istegen edi. Bul jolǵy saılaý úderisteri de halyqaralyq zań talaptary aıasynda ótetinine senim bildirdi oblystyq saılaýǵa baqylaý jasaý fılıalynyń tóraǵasy Ǵ. Tóleǵul.
Jýrnalıster tarapynan da kóptegen saýaldar qoıyldy. Onda saılaý kezinde zań buzý faktileri anyqtala qalǵan jaǵdaıda ony sheshýdiń tetikteri áńgime ózegine aınaldy. Biraq, bul qoǵamdyq baqylaý komıssııasy saılaý komıssııasynyń jumysyna aralasa almaıdy. Tek, baıqaý quzyryn ǵana ıelenedi. Sondyqtan, aldaǵy saılaýdyń zań aıasynda ótýi úshin atalǵan qoǵamdyq komıssııa belsene atsalysatyn bolady.
Baqbergen AMALBEK,
«Egemen Qazaqstan».
KО́KShETAÝ.