Aıdananyń álemi

Osydan eki jyl buryn Aıdana Nurtazına esimdi jas kásipker «Kıim tigý jáne jóndeý bo­ıynsha atele ashý» jobasymen nesıe alyp, óz bıznesin bastaǵan bolatyn. Búgingi kúnde ol «Damý» kásipkerlikti damytý qorynyń kómegine súıenip, kásibin óristete túsýdi kózdep júr, keń­sesin keńeıtpekshi, jańa tigin stanoktaryn alyp, qosymsha jumys oryndaryn ashpaqshy. «Jurttyń bári ınflıasııany, arzandap ketken munaıdy jazǵyrady. Menińshe, bul dúnıedegi eń qorqynyshty nárseler – soǵys pen asharshylyq. Al qalǵany – bos áńgime. Men úshin daǵdarys de­genińiz – adamdy qamshylaıtyn, alǵa umtylýǵa yntalandyratyn qosymsha múmkindik kózi», – deıdi Aıdananyń ózi. Aıdana – qatal taǵdyrdyń synyna bala kezinde ushyraǵan jan. Toǵyz jasynda tizedegi bolmashy jaraqaty asqyna kelip, qaterli isikke aınalǵan edi. Dárigerler osyndaı dıagnoz qoıyp, aıaqty tizeden kesý kerek degen uıǵarymǵa kelgen. Alaıda ákesi mu­nymen kelise qoımady. Qyzynyń bolashaǵyn oılaǵan áke jaqsylyqtan kúderin úzbeı, emshiden emshi qoımaı el ishin adaqtaǵan. Sóıtip júrgende arada segiz aı ótip, tizedegi isik asqynyp baryp jam­­basqa shapqan edi. Amal joq, syrqaty ábden qa­jytqan Aıdananyń operasııa ústeline jatýy­na týra keldi. Ota jasalyp, oń aıaq jambastan kesilgen... Qaıran ana qyzynyń janynan ketpeı, aýrýhanada bir jyl baqty. Ata-ananyń sheksiz mahabbaty men sarqylmas meıirimi Aıdana qulynshaqty ýaıym men túńilýdiń qurdymynan aman alyp shyqqan bolatyn. Qaısar qyz ýaqyt óte kele baldaqpen júrýdi meńgerip aldy. Eń bastysy, ol ózin múgedekpin dep sanamaǵan. Úıde oqyp, orta mektepti bitirdi. Odan keıin bank kolledjiniń kúndizgi bólimine oqýǵa tústi. Namysqa tyrysyp, úıdegi sharýanyń bárin atqaratyn: kir jýyp, úı jınap, tamaq ta pisirdi. Onyń ómirge degen qulshynysy qurbylarynyń da qataryn kóbeıtken. Olardyń dostyq peıili Aıdanaǵa qanat bitirip, armanyn da asqaqtata túsken edi. Kolledjdi bitirgennen keıin Aıdana bank qyzmetkeri bola almady: eńbek tájirıbesi joq, onyń ústine ekinshi toptaǵy múgedekti kim jumysqa ala qoısyn?! Sodan dúkenderdiń birine baryp, bir buryshtan saýda núktesin ashty. Saýdasy júrip ketpese de kásipkerliktiń qyr-syryna ájeptáýir qanyǵyp aldy. О́z aldyma bıznes bastasam degen oı sol kezde kelgen bolatyn. «Qulannyń qa­sýyna myltyqtyń basýy» demekshi, dál sol jyldary elimizde 1-shi jáne 2-shi toptaǵy múgedek jan­dar­dyń jumys isteýine jaǵdaı jasalǵan edi. Aıdana bilekti sybanyp, qaladaǵy birneshe tigin sehynda jumys istedi. Eńbek ete júrip, óz aldyma seh ashsam degen armany da ulǵaıa túsken. Aqyry táýekelge bel býyp, óziniń jeke tigin atelesin ash­ty. Munyń aldynda sán kolledjinde úsh aılyq kýrstan ótip aldy. Habarlandyrý boıynsha eski tigin mashınalary satyp alyndy. Sóıtip, jańa atelesine «Aıda» degen qyzynyń esimin berip, jumysty bastap ta ketken bolatyn. Bul ómirdiń qyzyǵy men shyjyǵy taýsylǵan ba? Áý basta dárigerler Aıdananyń bala týýyna úzildi-kesildi qarsy boldy. Buǵan kóne qoıar Aıdana ma, birneshe ret qolhat jazyp júrip, aqyry ómirge Aıda esimdi sábıdi ákelgen. Kishkentaı ǵana Aıda anasynyń ómirin múlde ózgertip jibergen edi. Burynǵy burynǵy ma, Aıdana endi jańa bıikterge qulshyna qulash sermegen. «Bıznestiń jol kartasy-2020» baǵdarlamasyna qatysyp, Úkimettiń kásipkerlerge degen qamqorlyǵyn ba­rynsha paıdalandy. Kóp uzamaı Aıdananyń qolynan shyqqan sándi de sapaly kıim-keshek qala turǵyndarynyń suranysyna ıe bola bastady. Astanada ótken qoldanbaly óner konkýrsynda júldeli úshinshi oryn alyp, onyń syıaqysyn shap-shaǵyn bıznesiniń qajetine saldy. Aıdana bıznesten qoly sál bosaı qalsa, «Jan Dos» dep atalatyn múgedek sportshylardyń qoǵamdyq birlestigine baryp, bı úıirmesine qa­tysady. Búginde qazaqtyń qaısar qyzy múge­dekter arbashasynda otyryp-aq kez kelgen bıdi myń burala bıleıtin dárejege jetti. Tipti, halyq­aralyq konkýrsqa qatysyp, Avstrııa, Reseı, Grý­zııa syndy memleketterden kelgen myqty bıshi­lerdi artqa tastap, júldeli orynǵa da ıe boldy. «Kúndelikti jattyǵýlar janyma kúsh-qýat beredi. Bı men mýzyka meni kókke alyp ushatyn qu­diretti kúsh. Osyndaı sátterde men ózimdi erekshe baqytty sezinemin», – deıdi Aıdana. Mine, qıyndyqtan qaımyqpaǵan qazaq qyzynyń kishkene ǵana ádemi álemi ómirge degen osyndaı uly mahabbattan nár alady. Álbette, bul álemde nalý men muńǵa, túńilý men toryǵýǵa oryn múlde joq! Qaırat ÁBILDINOV, «Egemen Qazaqstan». QARAǴANDY. Sýretti túsirgen D. KÝZMIChEV.