Kemeńger tulǵaǵa arnalǵan kesh

Q.Jubanov atyndaǵy Aqtóbe óńirlik memlekettik ýnıversıteti ulttyq ádebıetimiz ben memleket isinde óshpes iz qaldyrǵan qarymdy qalamger Ábish Kekilbaevtyń ómiri men shyǵarmashylyǵyna arnalǵan «Zamana zańǵary» atty ádebı-ta­nymdyq kesh uıymdastyrdy. Elbasy N.Nazarbaevtyń ózi «Ábekeń – álemdik órkenıettiń ortaq qazynasyna olja salǵan sýretker. Kórkem oıdyń, kór­kem ádebıettiń kósemsózge jol bergen tusynda ol el-jurtyna úlgi beretin úrdiske qol artyp, ýaqyt minberine kóterildi», dep bátýaly sózin arnap, baǵalaǵan birtýar ulynyń halqymen birge ekenin, shyǵarmalary el erte­ńine qyzmet etip, onyń ekinshi ǵumyryn jal­ǵastyra beretinin osy kesh aı­ǵaqtaı tústi. Keshti ýnıversıtet prorektory, bıologııa ǵylymdarynyń doktory Saıra Áıpeıisova kirispe sóz sóılep ashyp, kúni keshe ǵana ómirden ozǵan Qazaqstannyń Halyq jazýshysy, QR Memlekettik syılyǵynyń laýreaty, Qazaqstannyń Eńbek Eri, kórnekti memleket jáne qoǵam qaıratkeri Ábish Kekilbaevtyń asyl beınesi halqymen máńgi birge jasaıtynyn jetkizdi. Oblystyq ishki saıasat basqarmasynyń basshysy Erbol Nurǵalıev zamana zańǵarynyń qalamynan týǵan, halqynyń asyl qazynasyna aınalǵan kesek týyndylarynyń qazaq ádebıeti ǵana emes, álem ádebıetinde shoqtyǵy bıik shyǵarmalar ekenin atap aıtty. Ýnıversıtet janyndaǵy ǵylymı-zertteý ınstıtýtynyń dırektory, fılologııa ǵylymdarynyń doktory Alpysbaı Musaev «Ábish Kekilbaev­tyń ómiri men shyǵarmashylyǵy» degen taqyrypta baıandama jasa­dy. Osy joǵary oqý ornynyń «Bilim men tárbıeniń áleýmettik jáne dúnıetanymdyq máselelerin zertteý» ortalyǵynyń jetekshisi, fı­losofııa ǵylymdarynyń doktory, professor Amangeldi Aıtaly Ábish Kekilbaevtyń saıasatkerligi men qoǵam qaıratkerligi haqynda áserli áńgime órbitti. Ardager jýrnalıst Idosh Asqar qazaqtyń kemeńger ulymen Qazaq ýnıversıtetinde óksheles oqy­ǵanyn aıta kelip, sol stýdenttik kezdiń ózinde-aq onyń bolashaǵynan úmit kúttiretindeı shyǵarmashylyq qadamyna kýá bolǵanyn jetkizdi. Ol osy ýnıversıtettegi «Úrker» shy­­ǵarmashylyq úıirmesine qazaq ádebıetiniń juldyzy bıik jampozy Ábish Kekilbaevtyń atyn berý týraly usynysyn bildirdi. Kesh barysynda ýnıversıtet kitaphanasy Ábish Kekilbaevtyń shyǵarmashylyǵyna arnalǵan kitap kórmesin uıymdastyryp, stý­dent­terdiń kúshimen konserttik baǵ­darlama usyndy. Zamana zańǵaryna arnalyp shyǵarylǵan jańa ánder shyrqaldy, kóńil tolqytarlyq óleń­der oqyldy, abyz tulǵany ardaqtap eske aldy. Satybaldy SÁÝIRBAI, «Egemen Qazaqstan». Aqtóbe oblysy.