Qýanysh syılaǵan 100 páter

Búgingi kúnniń bir talaby halyqty qoljetimdi baspanamen qamtamasyz etý bolyp tabylady. Aıtalyq, Jetisý jerinde atqarylyp jatqan nátıjeli jumys esh dabyrasyz memlekettik saıasatqa saı ýaqyt údesinen shyǵyp, turǵyndarǵa qýanysh syılaýy sonyń jarqyn kórinisi ekeni anyq. Qashanda naqty isimen kórine biletin óńir basshysy sársenbiniń sátti kúninde «100 naqty qadam» Ult Jospary aıasynda 100 páter kiltin taldyqorǵandyqtarǵa tapsyrdy. Naqtylaı tússek, Taldyqorǵannyń Shyǵys shaǵyn aýdanynda medısına qyzmetkerlerine 60 kommýnaldyq páterdiń, al Ońtústik-Batys shaǵyn aýdanynda jalpy turǵyn úı alý kezeginde turǵandarǵa 40 nesıelik páter berildi. Memleket basshysy «100 naqty qa­dam» Ult Jospary baǵdarlamasynda aıqyndap bergen negizgi basymdylyqtyń biri halyqtyń densaýlyǵyn jaqsartý bolyp tabylady. Bul óz kezeginde qyzmettiń sapasyn kóterip, mamandarǵa jaǵdaı jasaýǵa oń áserin tıgizýde. Kúni-túni tynbaı eńbek etetin dárigerlerdiń alańsyz jumys jasaýy – olardyń jaǵdaıynyń jaqsy bolýyna da baılanysty. Biz qaı kezde de eli úshin, halyqtyń densaýlyǵy úshin aıanbaı ter tógip júrgen medısına salasynyń qyzmetkerlerin qurmetteımiz. Elbasy tapsyrmasyn júzege asyrýda – elimizdegi jańa ekonomıkalyq saıasat baǵyty ınfraqurylymdyq nysandardy odan ári damytýǵa baǵyttalǵan. Osyǵan oraı, Jetisý óńirinde qurylys jumystary qarqyn alýda. Oblysymyzda «Qoljetimdi baspana-2020» baǵdarlamasynyń barlyq baǵyttary qamtylyp, bıyl da jalǵasyp keledi», dedi Almaty oblysynyń ákimi Amandyq Batalov. Qoryta aıtqanda, bul qadam memlekettiń halyqqa jasap jatqan jaqsylyǵynyń jarqyn kórinisi. Búginde turaqty jumys orny bolǵanymen páter jaldap turatyn mamandar Taldyqorǵanda da barshylyq. Mine, sondaı bilikti dárigerdiń biri oblystyq kardıologııa ortalyǵynyń hırýrgi Qurbanáli Sábdenov «2010 jyly Asfendııarov atyndaǵy Qazaq Ulttyq medısınalyq ýnıversıtetin bitirip, Taldyqorǵanǵa kelip mamandyǵym boıynsha qyzmetke ornalas­tym. Sodan beri páter jaldap turdym. Bir balam bar. Ekinshi balamyzdy tosyp otyrmyz. Endi, mine, memleketimizdiń halyqqa jasap otyrǵan jaqsylyǵyna jetip, qos bólmeli páter kiltin aldyq», dedi ol qýa­nysh qushaǵynda turyp. Nurbol ÁLDIBAEV, «Egemen Qazaqstan». TALDYQORǴAN.