Batys Qazaqstan oblystyq kásipkerlik jáne ındýstrııalyq-ınnovasııalyq damý basqarmasy bastamashy bolǵan saılaýaldy uıymdastyrý sharalary sony sıpat alyp otyr. Onyń aýqymy óńirdegi kásipkerler men shaǵyn bıznes ókilderiniń qalyń toptaryn quraıdy. Sonymen birge, «Damý» kásipkerlikti qoldaý qorynyń aımaqtyq fılıaly men oblystyq kásipkerler palatasynyń yntaly toptary da aldaǵy 20 naýryz kúni ótkiziletin Parlament Májilisi men barlyq deńgeıdegi máslıhattar saılaýlarynyń mańyzdylyǵyna erekshe mán berýde.
Olar saılaý ótetin kúnniń ózektiligin jalań túrde emes, ony búgingi qarjy daǵdarysynyń aldyn alý sharalarymen baılanystyra qarastyrýda. О́tken sársenbi kúni «Damý» qory fılıalynyń ǵımaratynda ótkizilgen oblys kásipkerleriniń basqosýy kezinde de olardyń aldaǵy saılaýdyń mańyzy men ereksheligine aıryqsha den qoıyp otyrǵany belgili boldy. Ári bul aradaǵy basty paryz kimniń kimge, nemese qaı partııaǵa daýys berýinde emes, azamattyq belsendilik tanytyp, saılaý kúnine óńir kásipkerleriniń bir kisideı tegis qatysýynda ekendigi jan-jaqty sóz boldy.
Bul turǵyda oblys kásipkerleri Elbasy Nursultan Nazarbaevtyń saılaý ótkizetin kúndi bekitip bergen Qazaqstan halqyna úndeýine qoldaý kórsetti. Aldymyzdaǵy saılaý Qazaqstan halqynyń birligi men yntymaǵy ári ózara jarastyǵy taǵy bir synnan ótetin tarıhı kúnge aınala alatynyna senim bildirdi. Biz tómende osy aıtylǵan oramdy oı-pikirlerdiń birqataryn gazet oqyrmandarynyń nazaryna usynǵandy jón kórdik.
Sholpan MAHMUDOVA,
shaǵyn bıznes ortalyǵynyń dırektory:
– Kezekten tys Parlament Májilisi jáne kezekti barlyq deńgeıdegi máslıhattar saılaýlaryn ótkizý jónindegi Elbasy úndeýin tolyǵymen qoldaımyn. Bul búgingi kúrdeli álemdik ekonomıkalyq ahýal jaǵdaıynda óte durys, oń sheshim boldy dep esepteımin. Qazir etekti keńge jaıyp, yrǵalyp-jyrǵalatyn kez emes. Búgingi kúni biz bárimiz ýaqyttyń ádil tóreshi ekenin tereń túısine bastaǵandaımyz. Ýaqyttan utylǵandar kóp nárseden utylady. Bul oraıda da kezekten tys saılaý belgileýdiń orny aıryqsha.
Álemde munaı baǵasy túsip ketti degen tirkesti biz bárimiz búginde jıi qaıtalaıtyn boldyq. Osy turǵyda shıkizattyq emes sektordy damytýdyń paıdasy mol. О́ńirdegi shaǵyn bıznes ókilderi onyń mańyzdylyǵyn aıryqsha sezinýde, ári is pen sózdiń birligine jetýge umtylýda. Saılaý kúni búgingi jáne aldaǵy ýaqyttarǵa belgilengen is-josparlarymyzdan tys tura almaıdy. Saılaýǵa biraýyzdan ún qosýdyń qajettiligi de osynda. Oǵan tegisteı qatysaıyq demekpin.
Borıs LAVRENTEV,
«Aq jol» shaǵyn jáne orta bıznes qaýymdastyǵynyń dırektory:
– Ár qazaqstandyqtyń aldaǵy 20 naýryz kúni beretin daýysy daǵdarysty aýyzdyqtaýǵa jáne alǵa qaraı damýymyzǵa qosylatyn bir tamshy úles desem, qatelespeıtin shyǵarmyn. Osy oraıda, áriptesterimniń saılaýǵa tegis qatysý jónindegi bastamasyn tolyqtaı qoldaımyn. Respýblıkada kásipkerliktiń jan-jaqty óristep, irgesi bekı túsýine Memleket basshysynyń kórsetken qoldaýyna eshqandaı baǵa jetpeıdi. Buǵan ispen jaýap berý, otandyq óndiristiń órisin keńeıtý endigi kezekte bizderdiń úlesimizdegi is bolmaq.
Sondaı-aq, Elbasy óz úndeýinde joǵary zań shyǵarýshy organǵa kezekten tys saılaý ótkizýdiń qajettiligin taıǵa tańba basqandaı etip atap kórsetti. Ony qaıtalap jatpaı-aq qoıaıyn. Bul saılaýdyń orny bólek. Saılaý kúni bárimizdiń saılaý ýchaskelerinen tabylǵanymyz aldaǵy órkendi isterge bastaıtyn irgeli qadam bola alady degen oıdamyn.
Temir QUSAIYN,
«Egemen Qazaqstan».
ORAL.