ASTANA. 12 aqpan. Almatyda Elbasy Nursultan Nazarbaev aqyn, qoǵam qaıratkeri Oljas Súleımenovpen kezdesti. Bul týraly akorda.kz saıtyna silteme jasaǵan egemen.kz tilshisi habarlady.
Kezdesýde elimizdiń qarýsyzdaný jáne ıadrolyq qarýdy taratpaý salasyndaǵy qyzmeti talqylanyp, Memleket basshysynyń Semeı ıadrolyq polıgonyn jabý týraly Jarlyqqa qol qoıýynyń 25 jyldyǵy aıasynda ótetin is-sharalarǵa daıyndyq máseleleri qarastyryldy.
Sonymen birge Elbasy qazirgi geosaıası jaǵdaıdyń qıyndap bara jatqanyn aıta kelip, beıbitshilik pen qaýipsizdikti saqtaýda Qazaqstannyń ustanyp otyrǵan saıasatynyń mańyzdylyǵyn atap ótti. Jazýshy Oljas Súleımenov óz kezeginde jahandyq antııadrolyq qozǵalysqa memleketterdiń ǵana emes, qoǵamdyq uıymdardyń kúsh-jigeri men azamattyq bastamalardyń mańyzdylyǵyna nazar aýdardy.
Dastan Kenjalın.
Derek, sýret: akorda.kz