Memleket basshysy N.Á.Nazarbaev «Nurly Jol – bolashaqqa bastar jol» atty halyqqa Joldaýynda Ulttyq qordan 2015-2017 jyldarǵa deıingi kezeńge jyl saıyn qosymsha 3 mıllıard dollarǵa deıin bólý jóninde sheshim qabyldaǵan bolatyn. Sondaı-aq, bul jumystarǵa belsene aralasyp, barlyq deńgeılerde qatań partııalyq baqylaý ornatýdy «Nur Otan» partııasyna tapsyrǵan edi.
Elbasy júktegen mindetterdi júzege asyrý maqsatynda Mańǵystaý oblysynda áleýmettik nysandar salý úshin Ulttyq qordan úlken kólemde qarjy quıyldy. Osy oraıda, Mańǵystaý oblystyq máslıhatyndaǵy «Nur Otan» partııasynyń depýtattyq fraksııasy janyndaǵy memlekettik bıýdjet qarajaty men Ulttyq qordan bólingen qarjylardyń maqsatty jáne tıimdi paıdalanylýyn baqylaý komıssııasy Aqtaý qalasynda salynǵan nysandarǵa tekserý júrgizý jumystaryn bastady.
Komıssııa músheleri aldymen Aqtaýdaǵy «Jańa shaǵyn aýdandardyń kárizdik taratý júıesiniń qurylysy» jobasymen tanysty. Bul, ataýy aıtyp turǵandaı-aq, qanatyn keńge jaıyp kele jatqan Aqtaý qalasynyń jańadan salynǵan jáne salynatyn ondaǵan shaǵyn aýdandaryna qajetti ınfraqurylymdyq qyzmetke oraılastyrylǵan joba. Quny 1 101 978,0 myń teńge turatyn bul joba úshin 2015 jyly elimizdiń Ulttyq qorynan maqsatty transfert esebinen 1 067 391,0 myń teńge bólingen. Qazirgi tańda kárizdik qubyrlar tartatyn jyralar qazylyp, jumys qalypty júrýde.
«Nurly Jol» baǵdarlamasy boıynsha salynǵan jańa 32 «a» shaǵyn aýdanyndaǵy 120 páterlik turǵyn úıdiń salynýy men paıdalanýǵa berilýi týraly komıssııa múshelerine Aqtaý qalasy ákiminiń orynbasary О́.Bısaqaev baıandady. «Qoljetimdi turǵyn úı-2020» baǵdarlamasy aıasynda salynǵan jaılylyǵy jóninen 3 synypty úılerdiń qurylysy aıaqtalyp, óz ıelerin kútip tur. Quny 1 322 625,0 myń teńgeni quraǵan baspana qurylysy kezekte turǵan azamattarǵa berilmek.
– Qurylys nysandaryn aralaýǵa qurylǵan komıssııa quramynda «Nur Otan» fraksııasynan úsh depýtat jáne arnaıy mamandar bar. Biz osy tekserý jumystaryna qatysty arnaıy keste túzgen bolatynbyz, osy keste boıynsha mezgilinde tekserýge shyǵyp turamyz. Qaısy qurylys nysanynda qarjy jetispeýshiligi bar, kózge kórinip turǵan qandaı kemshilikter bar – osynyń bárin biz qadaǵalap, der kezinde sheshim alyp, jolǵa qoıýǵa jumys jasap kelemiz, deıdi «Nurly Jol» baǵdarlamasynyń júzege asýyn qadaǵalaý boıynsha «Nur Otan» partııasy janynan qurylǵan komıssııanyń múshesi, Mańǵystaý oblystyq máslıhatynyń depýtaty, «Qalamqasmunaıgaz» О́B basshysy Nurpeıis Sársenbaı.
Depýtattardyń tekserý jumystary jalǵasyn taba bermek.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.