Týabitti dertke qarsy shydamdylyqpen tura bilip, qaısar minez tanytqan qyzdyń júrek syry.
Men ómir úshin kúnde kúresip júrgen jandardyń birimin. Mańdaıyma taǵdyr jazǵan taýqymet taýdan da úlken, tastan da aýyr. Biraq men ony shamam kelgenshe kóterip, ómir degen ózenmen alǵa qaraı jyljyp baramyn. Qandaı jaǵalaýǵa baryp toqtarymdy ózim de bilmeımin.
...Anam meni aýyr bosanǵan eken. Álsiz, aýrýshań bolǵanymdy jıi aıtyp otyratyn. 1 jastan asqan kezde dárigerler sal aýrýyna shaldyqqan degen dıagnoz qoıǵan. Sodan beri meni anam bir sátke de kózinen tasa qylǵan emes. Uıyqtasam, ústime jyly kórpemdi jaýyp, qasymda otyrady. Kózimdi ashsam, aıaly alaqanymen basymnan sıpap, shaıymdy daıyndap, ádemi áńgimelerimen kóńilimdi aýlaıdy. Biz Jambyl aýdanynyń týmasymyz. Osydan 15 jyldaı buryn Petropavl qalasyna kóship kelgenbiz. Ol kezde men 12 jasta bolatynmyn. Aýyl mektebinen keıin oblys ortalyǵyndaǵy Shámil Shaqshaqbaev atyndaǵy mektep-ınternatta oqydym. 1 jyldaı úıde otyrdym. Eshqaıda barǵym da, eshkimmen sóıleskim de kelmedi. Tórt qabyrǵaǵa telmirip, jalǵyzdyqtyń shyrmaýyna baılap-matalyp, aýyr kúı keshtim. Aqyry mundaı taýqymetke shydaı almaıtynymdy túsinip, anammen ashyq syrlastym. Bala kezimnen aýdarmashy bolý armanym edi. Mektep qabyrǵasynda júrgende aǵylshyn, nemis tilderine erekshe den qoıǵanymdy biletin anam meni birden qoldady. Keı týǵan-týystarymnyń qarsylyǵyna qaramastan Manash Qozybaev atyndaǵy Soltústik Qazaqstan memlekettik ýnıversıtetine oqýǵa tústim. Syrttaı bólimde oqyp júrip, kúıbiń tirliktiń biraz qıyndyǵyn bastan ótkerdim. Anam únemi qasymda júrdi. Avtobýsqa mingizip, túsirip, kitaptarymdy ustap, áıteýir, qolynan kelgen kómegin aıamady. Birge oqyǵan kýrstas qurbylarymmen til tabysyp kettim. Memlekettiń qoldaýy arqasynda 2008 jyly AQSh-tyń Indıana shtatyna 2 aıǵa til úırenýge bardym. Petropavl qalasynan jalǵyz ózim, al Qazaqstannan 4 adam boldyq. Shetelge tuńǵysh shyqqan saparymda kemtar jandardyń eshkimnen kem emes ekendigine, olardyń da eńbek etip, bilim alyp, basqalar sııaqty qoǵamdyq jumystarǵa qatysa alatyndaryna kózim jetti. Qazaqstandaı elde turatynymdy zor baqyt sanadym. Buǵan deıin “Meniń taǵdyrym nege osyndaı boldy?” degen suraq janymdy jegideı jeıtin. Sol joly kólik apatyna ushyrap, júre almaı qalǵan jigittiń áńgimesin tyńdap, qolarbaǵa baılansa da, jumysqa belsene aralasatynyn kórip, jigerime jiger qosyldy. Onyń oqýǵa, ózgege kómektesýge degen qulshynysy meniń ómirge degen kózqarasymdy túbegeıli ózgertti. О́zgeniń taǵdyry arqyly ómirdi baǵalaı bilý qasıetin uqtym.
Birqatar avtobýstardyń júrgizýshileri meni ábden tanyp alǵan. Aıaldamada kórse boldy, toqtap, ishke kirgizip, otyrǵyzyp, túsýime kómektesedi. Kitaphana, basqa da qoǵamdyq jerlerde qol ushyn berýge daıar turatyn adamdar az emes. Sondaı sátterde júregińe jylylyq uıalap, erekshe meıirimge bólenesiń. Keıbir kezderde kósheden ótkende syrtyńnan músirkeı qarap, ózinen-ózi úreılenip ketip bara jatqan adamdardy da kezdestiremin. Olardyń múgedekterdi ózderinen kem sanaıtyndaryn túsinbeımin. Mundaılar Elbasynyń «Qazaqstan joly–2050: bir maqsat, bir múdde, bir bolashaq» Joldaýynda aıtylǵan «...olar tek járdemaqy alyp qana qoımaıdy, sonymen birge, ózderin qoǵamnyń múshesi, paıdaly eńbekker retinde sezinetin bolady», degen parasat-paıymǵa toly qamqorlyq sózderin oı eleginen ótkizse, joǵarydaǵydaı kemsitýshilikke barmas edi.
Bala kezimnen aýdarmashy bolýdy armandadym dedim ǵoı. Aǵylshyn, nemis tilin meńgerip, qolyma dıplom alyp, bıik belesti baǵyndyrdym. Qazir sýret salýmen aınalysamyn. Shahmat oınap, ıoga, gımnastıkamen shuǵyldanamyn. О́zimdi kútip, qajetti em-dom alyp, qoǵamdyq jumystarǵa da aralasamyn. Astana, Almatyǵa baryp, múmkindigi shekteýli adamdardyń máselesin sheshýge baǵyttalǵan túrli sharalarǵa qatysyp turamyn. Kedergisiz júrip-turýdyń qıyndyǵyn bar bolmysymen túsinetin, sezinetin Aqjan, Sálimhan sııaqty «ARDOS-Júrek» múgedekter birlestiginiń múshelerimen tyǵyz qarym-qatynasta jumys isteımiz.
Alda kúıbiń tirliktiń qyzyǵy men qıyndyǵyna toly talaı belester tur. Olardy baǵyndyrý úshin bar kúsh-jigerimdi jınap, kúresýge erik-jigerim de, kúsh-qýatym da jetedi. Múmkindigi shekteýli jandardyń qoǵamdaǵy belsendiligine kúdikpen qaraıtyn qate oılardy kók muzdaı buzyp-jarý úshin qolymnan kelgenshe aıanbaımyn. О́ıtkeni, men ómirge ǵashyqpyn, deıdi Alma Qojabaeva.
Jazyp alǵan
Alma JÚSIPOVA.
Soltústik Qazaqstan oblysy.
––––––––––––––
Sýretti túsirgen
Talǵat TÁNIBAEV.