«Salamatty Qazaqstan» sapary

Keshe Ishki ister mınıstrliginiń Tótenshe jaǵdaılar komıtetinde brıfıng ótkizilip, onda «Salamatty Qazaqstan» medısınalyq poıyzy Qaraǵandy oblysy boıynsha óz saparyn bastaıtyny aıtyldy. Komıtettiń resmı ókili R.Iý.Imanqulov jáne «Apattar medısınasy temirjol gospıtaldary» AQ basqarma tóraǵasy Ǵ. T.Áb­dil- manov osy sapardyń mán-jaıyn túsindirdi. Aqpannyń 15-si men naýryzdyń 16-sy aralyǵynda bir aıdy qamtıtyn sapar barysynda poıyz Qaraǵandy oblysynyń 19 stansasynan ótedi. «Salamatty Qazaqstan» medısınalyq poıyzy – Tótenshe jaǵdaılar komıtetiniń «Apattar medısınasy temirjol gospıtaldary» aksıonerlik qoǵamy, «Qazaqstan temir joly» UK» aksıonerlik qoǵamy jáne Qazaqstan Respýblıkasynyń Densaýlyq saqtaý jáne áleýmettik damý mınıstrligi birlesip iske qosqan úsh medısınalyq poıyzynyń biri. «Medısınalyq poıyzdar» jobasy – bul shalǵaı eldi mekenderdiń turǵyndaryna joǵary sanatty medısınalyq kómek kórsetýge múmkindik beretin, el tarıhyndaǵy teńdesi joq áleýmettik joba. 2010 jyly «Densaýlyq» poıyzy «№1 áleýmettik-jaýapty joba» retinde «Jyl tańdaýy – 2010» ulttyq syılyǵynyń jáne «Jyldyń eń úzdik áleýmettik jobasy» – «Paryz» áleýmettik jaýapkershilik bıznes baıqaýynyń jeńimpazy atanyp, jurtshylyq qurmetine ıe boldy. Medısınalyq poıyzdar eki áleýmettik mańyzdy mindetti sheshýge, atap aıtqanda, qoljetimdi ári sapaly medısınalyq qyzmet kórsetýge kómektesedi. 2010 jyldan beri «Densaýlyq», «Járdem» jáne «Salamatty Qazaqstan» medı­sınalyq poıyzdary iske qosyldy, olar shalǵaı­daǵy stansalar men shaǵyn beketterge qyzmet kórsetedi. Poıyzdar qajetti barlyq dıagnostıkalyq apparatýralarmen jaraqtalǵan jáne joǵary bilikti 20-ǵa jýyq medısınalyq kadrlarmen jasaqtalǵan. Sondaı-aq, medısınalyq mamandar quramy biliktiligi birinshi sanattan kem emes dáriger­lermen jáne orta býyn medısınalyq qyz­metkerlermen qamtylǵan. 2010 jyldan beri «Densaýlyq», «Jár­dem» jáne «Salamatty Qazaqstan» úsh kon­sýl­tatıvti-dıagnostıkalyq poıyzdary 1 292 kún ishinde 137 482,5 shaqyrym jol júrip, respýblıka oblystaryndaǵy 916 stansanyń turǵyndary tekserildi. Medısınalyq poıyzdardyń mańyzdylyǵy jyl ótken saıyn artpasa, azaıǵan emes. Osy jolǵy saparda dárigerlerdiń táýligine 150-200 adamnan qabyldaı alatyn qaýqary bar. Raýan QAIDAR, «Egemen Qazaqstan».