*Jambyl – 170
Reseı astanasynda qazaqtyń jyr alybyna arnalǵan kesh ótti
О́tken dúısenbide Máskeýdiń Ulttar Úıinde HH ǵasyrdyń Gomeri atanǵan qazaq halqynyń uly aqyny Jambyl Jabaevtyń 170 jyldyǵyna arnalǵan ádebı-sazdy kesh bolyp ótti. Bul keshti Reseı Federasııasyndaǵy Qazaqstan elshiliginiń jáne Ulttar Úıiniń qoldaýymen Qazaq jastarynyń odaǵy uıymdastyrdy. Máskeýdiń ádebı qoǵamdastyqtarynyń, joǵary oqý oryndarynyń, qazaq dıasporasy qoǵamdyq uıymdarynyń ókilderi, qazaqstandyq stýdentter keshke molynan jınaldy.
Reseı Ádebı Palatasy atqarý komıtetiniń tóraǵasy Georgıı Bregman óziniń quttyqtaý sózinde Jambyl Jabaevtyń eki zamanda ómir súrip úlgergenin atap kórsetti. «Onyń shyǵarmashylyǵyn eki kezeńge bólýge bolady. Revolıýsııaǵa deıin onyń óleń-jyrlary negizinen epostyq baǵytta bolyp, halyq ómirine arnaldy. Al tóńkeristen keıin ol sovettik ómirdi shynshyldyqpen jyrlady. Munyń ózi sol kezdegi sovettik poezııadan túbirinen ózgeshe bolyp keldi. Meniń paıymdaýymsha, Jambyl poezııasy sol kezdegi birtutas Keńes Odaǵyndaǵy Qazaqstan men Reseıdi máńgilikke biriktirdi. Onyń shynaıylyǵy árbir shyǵarmasynan aıqyn kórinedi», – dedi G.Bregman.
Budan keıin sóz alǵan Reseı jaratylystaný ǵylymdary akademııasynyń korrespondent-múshesi Dına Amanjolova uly aqynnyń erekshe mıssııasyna toqtalyp, onsyz qazaq mádenıetin kózge elestetý múmkin emestigin aıtty.
– О́z ómirinde kópti kórgen abyz retindegi Jambyl Jabaevtyń ulylyǵy sonda, ol óz halqy aldyndaǵy aqyndyq jaýapkershiligin tereń túsine aldy. Biz qazaqtar úshin sóz óneriniń, sóz mádenıetiniń tótenshe mańyzdylyǵyn bilemiz. Uly aqyn osy oraıdaǵy mıssııasyn da tamasha atqardy. Sondaı-aq, biz Jambyl shyǵarmalaryn orys tildi tyńdarmanǵa uǵynyqty jetkize bilgen besaspap tárjimashy Kýznesovtyń da keremet eńbegin baǵalaýymyz kerek, – degen D.Amanjolovanyń sózin qaýym jaqsy qabyldady.
Jambyldyń óz óleń-jyrlarynda, tolǵaýlarynda qazaq halqynyń ómiri týraly shynshyl da kórkem órnekter jasaǵany, sazdy ımprovızasııa – sýyryp salmalyqtyń sańlaq has sheberi bolǵany belgili. Aqyn batyrlar týraly qaharmandyq dastandar tolǵady. Uly Otan soǵysy jyldarynda Jambyldyń jalyndy jyrlary jaýyngerlerdi erlikke jigerlendirdi, onyń óleńderin jatqa aıtty. Ǵasyr jasaǵan jyraý jasampaz erlikti asqaqtatty, kúıki pendeshilikti jyr joldarymen jerledi.
Keshke qazaqstandyq jastardyń shyǵarmashylyq ujymdary kórik qosty. Jınalǵan qaýym Jambyldyń dombyrada oryndalǵan mýzykalyq shyǵarmalaryn, ǵajap jyrlaryn tyńdady. Olar sondaı-aq, jyr alybynyń Almatyda, Alataý bókterinde turatyn urpaqtarynyń beınejoldaýyn tamashalap kórdi.
Nazar QASYM.