QYZYLORDA. 17 aqpan. О́tken jyly Qyzylorda oblysynda «Bıznestiń jol kartasy-2020» baǵdarlamasy sheńberinde óndiristik ınfraqurylymdy damytýǵa jáne kásipkerlikti qoldaýǵa 2,6 mlrd. teńge bólindi. Aldyńǵy jylmen salystyrǵanda 77 paıyzǵa kóp. Bul týraly Qyzylorda oblysynyń ákimi Qyrymbek Kósherbaevtyń halyq aldyndaǵy esepti kezdesýinde aıtqan aqpary boıynsha egemen.kz tilshisi habarlady.
Baǵdarlama aıasynda qolǵa alynǵan ındýstrıalyq aımaqtardy qurý jáne damytý bastamasy jalǵasyn tapty. Aral, Qazaly, Jalaǵash jáne Shıeli aýdandary men Qyzylorda qalasynda qurylǵan ındýstrıalyq aımaqtarǵa ınjenerlik ınfraqurylym tartylyp, ınvestısııalyq jobalardy iske asyrýǵa qolaıly jaǵdaı jasaldy. Sonyń nátıjesinde 2015 jyly atalǵan aımaqtarda jalpy quny 2 jarym mıllıard teńgeden asatyn 16 joba iske asty.
Syrdarııa jáne Jańaqorǵan aýdandarynda ındýstrıalyq aımaqty qurýdyń jobalyq-smetalyq qujattary ázirlenip, tıisti jer telimderi bólindi. Týrıstik ınfraqurylymdy, onyń ishinde Qarmaqshy aýdany Tóretam kentinde ındýstrıaldy-týrıstik aımaqty daıyndaý jumystary bastaldy. 2014 jyldyń aıaǵynda aýyldyq jerlerde bıznesin jańadan bastaýshy kásipkerlerge qoldaý kórsetý tetigi retinde «О́ńirlik ınvestısııalyq ortalyq» quryldy. О́tken jyly óńirlik ınvestısııalyq ortalyq barlyq aýdandarda belsendi jumys istep, jalpy quny 342,1 mln. teńge 56 jobany qarjylandyrdy, jańadan 223 jumys orny ashyldy.
«Bul negizinen shaǵyn, 3-5 adam jumys isteıtin naýbaıhana men kondıterlik sehtar, tehnıkalyq qyzmet kórsetý beketteri men tigin sheberhanasy sekildi qarapaıym bastamalar. Biraq ózderi shaǵyn bolǵanymen, tap osy orta bolashaqta ekonomıkanyń negizgi tiregine aınalady. Sondyqtan memleket bul jumysty jalǵastyrady. Al qoǵam ony jan-jaqty qoldap, nasıhattaý arqyly jańa, jas kásipkerlerdiń kóptep paıda bolýyna kómektesýi qajet», dedi oblys ákimi Qyrymbek Kósherbaev.
Joǵaryda atalǵan sharalardyń nátıjesinde ótken jyly aımaqta tirkelgen kásipkerler sany 7,8 paıyzǵa artty. Bul elimizdegi eń joǵary kórsetkishterdiń biri.
Erjan Baıtiles.
Derek, sýret: egemen.kz