QYZYLORDA. 17 aqpan. Qyzylorda oblysy halyqaralyq qarjy uıymdary jáne «Memlekettik-jekemenshik áriptestik» negizinde 333 mlrd. teńge bolatyn 31 jobany iske asyrmaq. Bul týraly Qyzylorda oblysynyń ákimi Qyrymbek Kósherbaevtyń halyq aldynda esep berý kezdesýinde aıtqan aqpar boıynsha egemen.kz tilshisi habarlady.
«Ashyǵyn aıtqanda, halyqaralyq qarjy naryqtary men valıýtalyq júıeniń asa turaqsyz kezeńinde syrttan qarajat tartý da qıyndap barady. Degenmen, barymyzdy salyp, atalǵan jobalardy iske asyrýǵa bekindik. Oǵan múmkindik bar, ınvestorlardyń bizdiń jobalarǵa degen qyzyǵýshylyǵy áli de joǵary», dedi Qyzylorda oblysynyń ákimi Qyrymbek Kósherbaev.
Sońǵy úsh jylda ótkizilgen alty “Baıqońyr” ınvestısııalyq forým aıasynda barlyǵy 70-teı áriptestik týraly sharttar men memorandýmdarǵa qol qoıyldy. Sonyń arqasynda oblys ekonomıkasyna 100 mlrd. teńgeden astam tikeleı ınvestısııa tartyldy.
Aımaqpen birigip jumys istep jatqan uıymdar qatarynda Eýropalyq qaıta qurý jáne damý banki, Azııalyq damý banki, Islam damý banki, Halyqaralyq qaıta qurý jáne damý banki, Halyqaralyq qarjy korporasııasy (“IFC”) bar.
Eýropalyq qaıta qurý jáne damý bankimen birlesken 8 joba bar, onyń jeteýi oblys ortalyǵy - Qyzylorda qalasynyń ınfraqurylymyn damytýǵa arnalǵan. Olardyń qatarynda Qyzylorda qalasynyń jylý júıesin jańartý; Shıeli, Jańaqorǵan aýdandary men Qyzylorda qalasyndaǵy temir joldyń arǵy bóliginiń elektr júıelerin jańartý; Qyzylorda qalasyn sýmen qamtý jáne sý burý júıesin qaıta qurý; jáne qaladaǵy avtobýs parkin salý sııaqty jobalar bar.
Halyqaralyq Islam qarjy uıymdary jáne Azııa damý bankimen ınfraqurylymdyq, ındýstrııalyq, aýyl sharýashylyǵy, sondaı-aq turǵyn úı jobalaryn iske asyrý tóńireginde kelissózder júrgizilýde.
Atap aıtqanda, Azııa damý bankimen Qyzylorda qalasynyń sol jaǵalaýyn damytýǵa qajetti ınjenerlik ınfraqurylym, turǵyn úı jáne áleýmettik-turmystyq nysandardy salý jobalaryn kezeń-kezeńmen iske asyrý múkindikteri qarastyrylýda.
Azııa damý banki bul jobany “aqyldy” qalany («SMART CITY») damytýǵa baǵyttalǵan ınfraqurylymdyq keshendi baǵdarlama retinde iske asyrý týraly usynys engizdi.
«Qazaqstandyq memlekettik-jekeshelik áriptestik ortalyǵy» aksıonerlik qoǵamy Qyzylorda oblysyn memlekettik-jekemenshik áriptestikti damytýdaǵy pılottyq óńir retinde belgiledi. Sonyń aıasynda «Memlekettik-jekemenshik áriptestik jobalaryn súımeldeý ortalyǵymen» birlesip 5 jobaǵa ınvestorlar tartý jumystary júrgizilýde. Atap aıtqanda, aýysymyna 500 adam qabyldaıtyn emhana, Qyzylorda qalasynda salynatyn kásiptik-tehnıkalyq lıseı, oblys ortalyǵy áýejaıynyń jolaýshylar termınalynyń qurylysy, apattyq jaǵdaıdaǵy mektepterdiń ornyna 11 mektep salý, sonymen birge Syrdarııa aýdanynyń turǵyndaryn sapaly aýyz sýmen qamtý jobalary.
Erjan Baıtiles.
Derek, sýret: egemen.kz