Burnaǵy kúni Norvegııanyń Lıllehammer qalasynda ótip jatqan jasóspirimder arasyndaǵy II qysqy Olımpııa oıyndarynda Qazaqstan qorjyny taǵy bir júldemen tolyqty. Atap aıtqanda, mánerlep syrǵanaýdan synǵa túsken otandasymyz Elızabet Tursynbaeva eki jattyǵý qorytyndysy boıynsha 167,88 upaı jınap, qola júldege qol jetkizdi.
Birinshi jattyǵý – qysqa baǵdarlamadan keıin 16 jastaǵy qarshadaı qazaq qyzy 59,11 upaımen ekinshi orynda turǵanyn atap ótken jón. Alaıda, erkin baǵdarlamadan keıin ol bir saty tómen syrǵýǵa májbúr boldy. Nátıjesinde Olımpıada «altyny» 186,04 upaı jıǵan reseılik Polına Sýrskaıaǵa buıyrdy. Al kúmis júlde 169,50 upaıǵa ıe bolǵan onyń otandasy Marııa Sotskovaıanyń enshisinde ketti.
Búginde eresekter arasynda baq synap, otandyq jankúıerlerge tanylyp qalǵan Elızabet Tursynbaeva atalǵan Olımpıadada budan da joǵary orynǵa laıyq bolǵan edi. Jasyratyny joq, odan kóbimizdiń tek «altyn» kútkenimiz de ras. Desek te, bul joly buıyrǵany «qola» boldy.
Osy jeńisti jol 2018 jyly Ońtústik Koreıanyń Phenchhan qalasynda ótetin qysqy Olımpıadada jalǵasyn tapsyn dep tileıik.
Aıta keteıik, Lıllehammerdegi jasóspirimder Oıyny bastalǵaly Qazaqstan qorjynyna úsh júlde tústi. Naqty aıtar bolsaq, dúbirli dodanyń úshinshi kúni bıatlonnan 6 shaqyrymdyq sprınttik jarysta synǵa túsken Arına Pantova Olımpıadanyń qola medalin moınyna taqty. Al keshe konkıshimiz Ánýar Muhamádıev aralas komanda sapynda sprınttik saıysqa qatysyp, ekinshi oryn aldy.
Elaman QOŃYR,
«Egemen Qazaqstan».