Qazaqstan Respýblıkasy óz Táýelsizdiginiń 25 jyldyq mereıtoıyna qadam basty. Memleket ornatý, ony álemdik qaýymdastyqqa tanytyp, moıyndatý kez kelgen urpaqtyń peshenesine jazyla bermeıtin baqyt, jaýapty da kúrdeli mindet ekeni aıan. Elbasy N.Nazarbaevtyń sarabdal saıasatynyń arqasynda búginde táýelsiz Qazaqstandy búkil álem moıyndady.
Osy oraıda álemge dara talanttarymen áıgili óner shańyraǵy – Qazaq ulttyq óner ýnıversıteti tuńǵysh ret «Tulǵalar taǵylymy» taqyrybynda memleket, qoǵam isine belsene aralasyp, óz únin qosyp júrgen qaıratker tulǵalarmen jyl boıy kezdesý ótkizýdi josparlap otyr.
Táýelsiz el bolǵan shırek ǵasyrdyń bederinde mádenı-rýhanııat salasynda da qyrýar jumystar atqaryldy. Bul baǵytty keshegi M.Áýezov, Ǵ.Músirepov, Ǵ.Mustafın sekildi ulylardyń izi qalǵan qarashańyraq – Qazaqstan Jazýshylar odaǵynyń da qosqan úlesi aıryqsha. Sondyqtan da táýelsizdikti tuǵyrlandyra túsýdegi zııaly qaýymnyń eńbegi qashanda erekshe baǵaǵa laıyqty. Sonyń bir aıǵaǵy retinde Parlament Senatynyń depýtaty, Qazaqstan Jazýshylar odaǵynyń tóraǵasy Nurlan Orazalınmen ótken kezdesýdi aıtqan bolar edik.
Shara shymyldyǵyn atalmysh bilim ordasynyń rektory A.Musaqojaeva ashyp berdi. Sodan soń dástúrli jyr-aıtys mamandyǵynyń 2-kýrs stýdenti Bek Shymat jyrdan shashý shashyp, kesh kórkin keltirdi.
Nurlan Myrqasymuly – elimizdiń saıası, mádenı, ómirine qoıan-qoltyq aralasyp, rýhanı keńistigimiz ben ulttyq oılaý júıemizdiń tutastyǵyn saqtaýda qaıratkerlik pen qalamgerlikti qatar alyp júrgen tulǵa. Ol tarıh betterin paraqtaı otyryp, «Táýelsizdik» degen kıeli de qasterli uǵymǵa qalaı qol jetkizgenimizdi, ózi basy-qasynda júrip kýá bolǵan sol bir qıyn-qystaý jyldardy erekshe tolqynyspen baıandady.
Taqyryp tóńireginde táýelsizdiktiń tuǵyryn bekite túsetin birshama máseleler de qozǵaldy. Aqyndyq ta, jazýshylyq ta eń aldymen óner. Osy baǵytta atalmysh óner oshaǵy janynan júregine qalamyn súıegen erekshe óner ıelerine baǵyt-baǵdar beretin «Jazýshylar zerthanasyn» ashý týraly da estir qulaqqa jaǵymdy, tushymdy usynys oı aıtylyp, oǵan rektor tarapynan kelisim de berilgendeı boldy.
Kesh barysynda N.Orazalınniń «Silkinis» atty óleńin drama akteri mamandyǵynyń 3-kýrs stýdenti Qobylandy Bolat náshine keltire kórkem oqydy. Birjan saldyń «On saýsaq», Qapez Baıǵabylulynyń «Úsh Merki», Qazanǵaptyń kúıi – «Kókeıge túsken Kókiljan» atty án-kúıleri basqa da ónerpazdardyń oryndaýynda tyńdarman qaýymnyń ystyq yqylasyna bólendi.
Osylaısha jyl basyndaǵy jyly júzdesý stýdent jastardyń júregin jyrmen jylytyp, kóńilderine qýat, sezimderine shýaq tókkendeı erekshe áserge bóledi. Nurlanyp, qanattanyp, jigerlene tústi olar. Bul baqyttyń ıesi – TÁÝELSIZDIK degen kıeli uǵym! Sony umytpasaq eken.
Raýshan TÁÝIRHANQYZY,
jýrnalıst.