Elde bolsa eringe tıedi

«Batyr bolsań jaýǵa naızań tısin, baı bolsań elge paıdań tısin, ekeýin de jasamasań jurttan bólek tikken úıiń kúısin» degen eken qazaqtyń ataqty bı­leriniń biri Áıteke. Aýyrlaý sóz, qatal úkim. Biraq, negizsiz emes. Jalǵyz shaýyp batyr bolmaısyń. Batyr – bir oqtyq. Er qylatyn da, ez qy­latyn da qasyńdaǵy qarasha, alqalaǵan jurtyń. Baı bolsań ormandaı elińniń arqasynda, óz eliń, óz jerińde maldy boldyń. Tileýińdi tilegen jurtyńa artyq dúnıeńnen bólisseń alǵys alasyń, isiń alǵa jyljıdy. «JańaArnaQurylys» serik­testiginiń dırektory Maǵaýııa Turysbekov osylaı paıymdaıdy. Mamandyǵy – tarıhshy. Toq­sanyn­shy jyldardyń sońynda Maǵaýııa Seksen­baıuly ınstıtýt qabyrǵasynan túlep ushqanda daǵdarystyń dendep turǵan shaǵy edi. Jas baladaı aıaǵyn áltek-táltek basqan jas memleket qaıda baǵdar ustar­yn bilmeı myqty memleketterge jaýtańdap qarap júrgen shaǵy. Qulaǵan óndiris­ten myqty ınjener ketti. Aýrýhana men mektepte de jaǵdaı qıyn. «Balapan basymen, turymtaı tusymen» ketip jatqan shaqta alǵyr jas qaıratyna mingen. Jeke kásipke den qoıdy. 2000 jyly «Syrym» JShS-in ashty. Ártúrli memleketterdiń damý jos­paryn oı eleginen ótkizip, úırenetinin úırenip, aıaǵynan nyq turǵan Qazaqstan­men birge sol eldiń bir kirpishi – Maǵaýııa Tu­rys­bekovtiń de kásibi órge ór­legen. Búginde ol basqaratyn «Jańa­Arna­Qurylys» serik­testiginde 100-den astam qyzmetker bar. Qurylys jumystaryn júrgizýge tájirıbeli maman, qajetti tehnıkalary saı. Memlekettik satyp alýda kóshedegi kóldeneń kók atty emes, barlyq kerek-jaraǵy saı, jeńip alǵan nysandy ýaqytynda ári sapaly salatyn merdiger jeńiske jetedi. «JańaArnaQurylys» JShS bul ja­ǵy­nan qamshy saldyrmaıdy. Qazaqstan tek shıkizattyń Otany bolyp, odan túsken tabys­ty maldanbaýy kerek. Elimizge óńdeýshi, óndirýshi myqty kásip­oryndar qajet. Elbasynyń erteden aıtyp kele jatqan sózine mán berip, oıyn aıtqyzbaı túsingen Maǵaýııa búginde «Ońtústik» ındýstrııalyq aımaǵynan jer alyp, medısınalyq qolǵap shyǵa­ratyn kásiporyn qurylysyn bastap ketti. Ákesi Seksenbaı aǵa kezinde sharýa­shylyqtarda basshylyq qyzmette bolǵan, búginde el kesimine toqtaıtyn kósheli kisi. Anasy – Úrzada jas urpaqqa bilim nárin sepken ustaz. Osyndaı ónegeli otbasydan shyqqan Maǵaýııa ózi týyp-ósken Sozaq óńirindegi qaıyrymdylyq isinen bir ret syrtqary qalǵan emes. Qamkóńil, turmysy tómen otbasylarǵa azyq-túlik jiberip turady. Búginde «Nur Otan» partııasy Sozaq aýdandyq fılıaly ornalasqan ǵımaratty da qazaqtyń atpaldaı uly Maǵaýııa Turys­bekov partııanyń kezekten tys XVI konferensııasynda tartý etken. Biraq, mundaı qaıyrymdylyq isterin kópshilikke jarııa etýdi jaratpaıdy. «Sú­ıer ulyń bolsa sen de súı, súıinerge jarar ol» degen osy. Baqtııar TAIJAN, «Egemen Qazaqstan». Ońtústik Qazaqstan oblysy.