«Demeý» qorynyń qaıtarymsyz nesıelerine qol jetkizgen qarmaqshylyqtar kásipterin dóńgeletip jatyr. Jalpy, aýdannan konkýrsqa 215 ótinish tapsyrylsa, sonyń ishinde 40 joba qoldaý tapqan. Endi aımaqta tigin sehtary ashylyp, úı qustaryn kóbeıtý qolǵa alynyp, shaǵyn sharýashylyqtar men kásip nysandary da ashylatyn bolady.
Qarmaqshylyq Jadyra Tuıaqbaeva 2014 jyldan bastap shaǵyn tigin sheberhanasyn ashyp, qazirgi tańda halyqqa qyzmet kórsetip keledi. Negizinen kórsetetin qyzmet túrleri qazaqy oıý-órnek arqyly kórpeshe, jastyq jasaý, qyz balanyń jasaýy jáne taǵy da basqa qolóner túrleri. Qazirgi tańda osy kásibin ári qaraı damytý maqsatynda «Baıqońyr» áleýmettik kásipkerlik korporasııasy arqyly «Demeý» grantyn «Tigin sheberhanasyn damytý» jobasy boıynsha utyp aldy.
Aqjar aýylynyń týmasy Jadyra Júsipbekqyzy ulttyq tárbıe men tálimge sýsyndap ósken jan. Es bilgeli anasynyń tigin mashınasymen kıim jóndep, kórpeshe qurap jatatynyn kórip ósken qarshadaı qyz qýyrshaqtaryna sáıkesinshe kóılekter piship, jastyǵy men kórpesine qamtyp qoıady eken. Jadyranyń ulttyq qolónerge degen qyzyǵýshylyǵy osylaısha bala kezinen bastaý alǵan.
– Anamnyń tikken kıimderinen qalǵan matalardan ártúrli pishinde qol sómkeler tigip alyp, mektepke ustap barǵanymda qurbylarym qyzyǵa da qyzǵana qaraıtyn. О́se kele Jańa jyl, kúzgi keshterge kóılekterimdi ózim tigip kıetin boldym. Anama kıim satyp áper demeımin, óz oıymdaǵydaı etip ózim tigip shyǵatynmyn. Árıne, birden bári keremet bolǵan joq. Sebebi, meniń qolyma ıne men jip berip eshkim kıim tik, toqy demedi. Anam muǵalim bolǵanymdy qalady. Mektep bitirgennen keıin Saryaǵashtaǵy pedagogıkalyq kolledjde oqyp, bastaýysh synyptyń muǵalimi mamandyǵyn aldym. Oqý bitirisimen Josaly kentiniń týmasy Beknııaz esimdi jigitke turmysqa shyqtym. Kelindik, analyq mindetterimdi abyroımen atqaryp kelemin. Ata-anamdaı bolǵan ata-enemniń qolynda 12 jyl turyp óz enshimizdi aldyq,– deıdi ıbaly kelin.
Enesi Qýantaı da ismer jan eken. Kelinine aqyl-keńesin aıtyp, bilgenin úıretýden jalyqpaıtyn kórinedi. Jadyra 3 balanyń anasy. Úıden tapsyrys qabyldap tigin tigip júrgen qolóner ıesi byltyr óz kúshimen kerekti quraldaryn, jaraqty tigin mashınasyn satyp alyp, shaǵyn sheberhana ashypty. О́zi tapsyrys qabyldaıdy, tigedi, ózi satýshy.
– Naýryz merekesi jaqyndaǵannan balabaqshalar men mektep oqýshylarynan ulttyq kıimderge tapsyrys kóptep túsedi. Barlyǵyn der kezinde, sapaly oryndaý meniń mindetim. Sondyqtan, kúndiz-túni jumys isteýdemin. Tapsyrys berýshiniń oıyndaǵydaı etip tigýge tyrysyp baǵamyn. Barlyǵy daıyn zatyn alyp ketýge kelgende qýanyp, kóńilderinen shyǵyp, aqysyn renjimeı berip ketedi. Munyń ózi maǵan kúsh beredi. Baryńdy baǵalaı bilgenderge, eńbegińdi eskerip, alǵysyn aıtqandarǵa qýanasyń. Men daıyn oıýlardy paıdalanbaımyn. Sebebi, olardyń sapasy kóńil qýantarlyq emes. Tez túsip qalyp jatady. Sondyqtan, barlyǵyn óz qolymmen oıyp, japsyramyn. Oıýlar daıyndaý ýaqyt alady, kóp oılanýdy talap etedi. Oǵan kóbine qyzym Aıshara kómektesedi. Kıiz de basa alamyn, shı de toqımyn, kıiz úıdiń barlyq kerekti jabdyqtaryn tigýge, jalpy, kimnen qandaı tapsyrys túsedi – qoldan kelgenshe sonyń barlyǵyn oryndaýǵa tyrysamyn. Izdenemin. Jas bola tura bilmeımin, jasaı almaımyn, qolymnan kelmeıdi dep aıtýǵa uıalamyn,– deıdi kásipker kelinshek.
Iá, tigin tigý, ulttyq ónerdi dáripteı bilý eń birinshi eptilikti, uqyptylyqty, shydamdylyqty talap etedi. Kózdiń maıyn taýysyp, jeti ret ólshep, bir ret kesetin mamandyq túri tiginshilikti oqymaı-aq úırenip, kásip etken Jadyranyń bul tirligi jastarǵa úlgi. Búginde ol memleket tarapynan qoldaý taýyp, kásibin keńeıtýdi kózdep otyr. Saýsaǵynan óneri tamǵan jas kásipkerdiń kásibine násip tileımiz.
Aıta keteıik, «Demeý» granttary halyqtyń áleýmettik turǵydan álsiz toptaryna, kópbalaly analarǵa, jumyssyzdar men múgedekterge berilip otyr.
Nurbek DÁÝRENBEKOV.
Qyzylorda oblysy.