Quqyqtyq qadamdar qajet

Qýat Rahımberdın – S.Amanjolov atyndaǵy Shyǵys Qazaqstan mem­lekettik ýnıversıtetiniń qylmystyq quqyq jáne qylmystyq úderis kafed­rasynyń meńgerýshisi, zań ǵylym­darynyń doktory, Shyǵys Qazaq­stan oblysy boıynsha azaptaýǵa qarsy ulttyq saqtandyrý tetigine qaty­sý­shylar tobynyń jetekshisi. «Aq jol» partııasynyń atynan О́skemen qalasy máslıhatynyń depýtaty kandıdattyǵyna tirkelgen Qýat Qajymuqanuly el keleshegi jergilikti ózin ózi basqarý organdaryn damytýǵa baılanysty ekendigin aıtady. – Máslıhat – jergilikti ózin ózi basqarý organyna jatady. Elimiz jergilikti ózin-ózi basqarýdy damyta otyryp, órkendeýi tıis. «Qazaqstan-2050» Strategııasynda ókilettikterdiń basym bóligi jergilikti ókildik organdarǵa beriletindigi kórsetilgen. Búginde jergilikti memlekettik basqarý qyzmetin shekteý, jergilikti ózin ózi basqarý organdarynyń menshigi men bıýdjetin qalyptastyrý, aýyldyq okrýgter deńgeıinde ákimshilik-aýmaqtyq birlikterdi jandandyrý máseleleri júrgizilip, jergilikti ózin ózi basqarýdy damytýdyń ekinshi kezeńi júzege asyrylýda. Bul – birtindep damytýdy qajet etetin ózekti másele. О́skemen qalasynda kóp jyldar boıy jergilikti ózin ózi basqarý komıteti jumys istep keledi, – dedi Q.Rahımberdın. Onyń aıtýynsha, jergilikti ózin-ózi basqarýdyń qazaqstandyq modelin qurýda ozyq elderdiń tájirıbesin eskergen jón. Byltyr bir top áriptesterimen Germanııanyń Berlın men Drezden qalalarynda bolyp, kóptegen máselelerdi tıimdi sheshý joldarymen birge jergilikti ózin-ózi basqarýdy uıymdastyrý táji­rıbesimen qanyǵyp qaıtqanyn jet­kizdi. Búginde nemis qalalaryndaǵy ońtaıly sheshimder modeli oblys ortalyǵyna da engizilýde. Qýat Qajymuqanuly jastar arasynda otanshyldyq tárbıeni arttyrý, halyqtyń quqyqtyq saýat­tylyǵyn kóterý syndy máse­lelerge de toqtaldy. Bul ret­te, oblys ortalyǵynda jas­tar arasynda oryn alatyn qyl­mys pen onyń sebepteri, saldar­lary jáne qylmystan saqtan­dyrý máselelerine naqty zertteý júrgizgenin atap ótti. Sońǵy shırek ǵasyrda 14-29 jas aralyǵyndaǵy jastar arasynda oryn alatyn qylmystyń negizgi sebepterin anyqtaǵan sırek zertteý jumys­tarynyń biri bolǵandyqtan, onyń qorytyndylary óńirdegi ishki ister men prokýratýra organdarynyń nazaryna alyndy. Dýman ANASh, «Egemen Qazaqstan». О́SKEMEN.