Barlyǵy zań aıasynda júrgizilýi tıis

Oblystyq ishki saıasat basqarmasynda Parlament Májilisi men barlyq deńgeıdegi máslıhattar depýtattarynyń saılaýaldy úgit-nasıhat jumystary máselelerine arnalǵan semınar-keńes boldy. Oǵan saıası partııalar men qoǵamdyq birlestikter ókilderi, oblystyq jáne qalalyq máslıhattarǵa tirkelgen úmitkerler, qalalyq jáne aýdandyq aýmaqtyq saılaý komıssııalarynyń tóraǵalary men hatshylary qatysty. Semınar-keńes barysynda barlyq qatysýshylardyń saılaý úderisinde, sonyń ishinde, saılaý­aldy úgit-nasıhat jumystaryn júrgizýde saılaý zańdylyǵy normalaryn múltiksiz saqtaýy, saılaý naýqanyn materıaldyq-tehnıkalyq jáne qarjylyq qam­tamasyz etý máseleleri talqy­landy. Oblystyq saılaý komıs­sııa­synyń tóraıymy Gúlnar Kún­baevanyń aıtýynsha, saılaý naýqanynda 526 saılaý ýchaskesi jumys isteıtin bolady. Oblysta qurylǵan 744 saılaý komıssııasynda 5208 múshe bar. Oblystyq, qalalyq, aýdandyq máslıhattar depýtattaryn saılaý úshin qazir 14 aýmaqtyq jáne 204 okrýgtik saılaý komıssııasy belsendi túrde jumys isteýde. 31 oblystyq, 23 qalalyq jáne 150 aýdandyq saılaý komıssııasy jumys isteıdi. Saılaýǵa týra bir aı qalǵanda ýchaskelik saılaý komıssııalary óz jumysyn bastaıdy. Buqaralyq aqparat qural­dar­ynda saılaý okrýgteri men ýchas­keleriniń shekarasy, saılaý komıs­sııalarynyń quramy týraly derekter jarııalandy. Ústimizdegi jylǵy 15 aqpan­daǵy málimetke súıensek, oblys boıynsha 642 úmitker usynyl­ǵan, olardyń 226-sy saıası par­tııalardyń ókilderi. «Nur Otan» partııasynan – 204, «Aqjoldan» – 12, Qazaqstan Kommýnıstik ha­lyq partııasynan – 5, «Aýyl» par­tııasynan – 4, «Birlikten» – 1, ardagerler qoǵamdyq birlestiginen 2 úmitker bar. Qalǵandary ózin ózi usynǵandar. Semınar-keńeste sóz alǵan oblys ákimi apparatynyń basshysy Mádı Eleýsiz saıası naýqanǵa daıyndyqtyń tııanaqty júrgizilip jatqanyn tilge tıek ete kelip, saılaý úderisin mate­rıaldyq-tehnıkalyq jáne qar­jylaı qamtamasyz etý baǵytynda eshqandaı problema joq ekenin jetkizdi. Oblystyq ishki saıasat bas­qarmasy basshysynyń orynbasary Ermek Taýanov saılaý úderisine qatysýshylardyń saılaýaldy úgit-nasıhat jumystaryn júrgizýdiń zań talaptaryna saı bolýyna jaǵdaı týǵyzylǵanyna toqtaldy. Al semınar-keńeste «Saılaý týraly» zańnamanyń qaǵıdattaryn qatań saqtaýǵa baılanysty basqa da máseleler baıyptylyqpen talqylandy. Satybaldy SÁÝIRBAI, «Egemen Qazaqstan». Aqtóbe oblysy.