Oblys ákimi Qanat Bozymbaev jurtshylyq aldynda esep berdi. Ákimniń aıtýynsha Indýstrııalandyrý kartasynyń birinshi besjyldyǵyna engizilgen kásiporyndar 180 mlrd. teńgeniń ónimin óndiripti. Eksport kólemi 100 mlrd. teńgeden asqan.
Endi bastalǵan ekinshi besjyldyqta oblysta ınvestısııalar jalpy kólemi 443,2 mlrd. teńgeni quraıtyn jańa nysandar tizbesi qosylypty. Jyl qorytyndysynda bul kásiporyndar quny 40 mlrd. teńgeni quraıtyn ónimdi syrtqa shyǵarǵan. Bul kúnderi 800 mlrd. teńgeden astam qarjy salynǵan 20-dan astam joba iske asyrylýda. Bıyl quny 25 mlrd. teńge turatyn 11 joba josparlanýda. Olardyń arasynda temirjol beldikteri men dóńgelek juptaryn shyǵarý, energetıkalyq mashına jasaý óndirisi, agrohımııalyq ónimderdi shyǵarý, eki ónerkásip jylyjaıy bar. Budan basqa, Q.Bozymbaev jergilikti kásiporyndardyń qytaılyq ınvestorlarmen birlesip 3 jobany iske asyratynyn aıtty.
Qazir oblys ortalyǵynda «Saryarqa», «Dostyq» degen jańa eki shaǵyn aýdan qurylysy júrgizilýde. Jalpy, 2015 jyly oblysta qurylys jumystarynyń kólemi aldyńǵy jyldyń deńgeıinen 1,5 esege ósken. Memleket basshysy Úkimettiń keńeıtilgen otyrysynda basymdyqty baǵdarlamalardy qarjylandyrýǵa arnaıy rezervten qosymsha qarajat bólý jóninde tapsyrma berdi. Sondyqtan, oblysta «Jumyspen qamtýdyń jol kartasy-2020» baǵdarlamasynyń sheńberinde 2016 jyly 2 dárigerlik ambýlatorııanyń, 2 feldsherlik-akýsherlik pýnkttiń jáne medısınalyq pýnkttiń qurylysy bastalmaqshy. Jumysshy jastar úshin Qashyr, Lebıaji, Pavlodar aýdandary men Aqsý kentinde 4 jataqhana salý josparda bar. Byltyr óńirde 2500 orynǵa arnalǵan 5 mektep salynsa, 4-ýi – aýyldyq jerde. Ekibastuzda qazaq tilinde bilim beretin 1200 oryndyq mekteptiń qurylysy júrgizilýde. Bıznestiń áleýmettik jaýapkershiligi aıasynda «ERG KО́MEK-tiń» qatysýymen 386 búldirshinge arnalǵan 4 balabaqsha qalpyna keltirildi. Olardyń biri mamandandyrylǵan – múmkindigi shekteýli balalar úshin, eki balabaqsha – álsiregen ımmýnıtetti balalarmen jumys isteıdi.
Densaýlyq saqtaý salasynda 2015 jyldyń sońynda oblystyq perınataldyq ortalyqtyń eń zamanaýı quraldarmen jabdyqtalǵan 100 oryndyq jańa korpýsy paıdalanýǵa berildi. Ortalyqta 9300 ana em alyp, 5800 sábı dúnıege kelse, endi jylyna 13 myń anaǵa joǵary sapaly medısınalyq kómek kórsetýge jáne 8 myń sábıdiń dúnıege kelýine múmkindik bolady. Oblystyń aýyldyq aýdandarynda 7 dárigerlik ambýlatorııa salyndy.
Aýyldyqtar úshin de ótken jyl jemisti jyl boldy. Jalpy, aýylsharýashylyq ónimderi óniminiń kólemi 13 paıyzǵa artty – bul respýblıkadaǵy eń joǵary kórsetkish. О́tken jyldyń basynda egis alqaptaryn keńeıtý, egisterdi ártaraptandyrý, ylǵal resýrstaryn saqtaý tehnologııalaryn qoldaný boıynsha úlken jumys júrgizildi. Sýarmaly eginshilikti damytý sharalary qabyldandy. Sońǵy eki jyl ishinde 10 myń gektardan asa jer engizildi, onyń ishinde 4 myńnan asa gektar jer iske qosyldy. 2018 jylǵa deıin bul alqaptardyń kólemin 52,4 myń gektarǵa deıin keńeıtý josparlanýda, dedi óńir basshysy.
Dándi daqyldar 1,6 ese, maıly daqyldar– 1,8 ese kóp jınaldy. Investorlardyń esebinen sońǵy 10 jyl boıy toqtap turǵan Ertis elevatory qaıta qalpyna keltirildi. Qazirgi tańda Ýálıhan elevatory men «Pavlodarskaıa NIVA» kompanııasynda qural-jabdyqtar qaıta qalpyna keltirilýde. Sonymen birge, 412 myń tonnadan astam nemese 1,2 ese ósimmen kartop jınaldy. Qazirgi tańda elimiz ben Reseıde satý úshin 50 myń tonnadan astam kartop jáne 15 myń tonna sábiz daıyndaldy. Búgin kartop elimizdiń birqatar oblystaryna jáne Reseıdiń shekaralas óńirlerine jetkiziledi. «Agrosoıýz» seriktestigi Grýzııa Respýblıkasyna 400 tonna kartopty jetkizý jóninde kelisimshartqa qol qoıdy. Mal sharýashylyǵynda etti eksporttaýdy damytýǵa baǵyttalǵan baǵdarlamalar júzege asyryldy.
Sútti mal sharýashylyǵyn damytý baǵdarlamasy boıynsha «Yrys» seriktestigi Pavlodar, Aqsý qalalarynyń aýyldyq aımaqtarynda, Kashyr jáne Pavlodar aýdandarynda 4 taýarly-sút fermalaryn paıdalanýǵa berdi. Jelezın aýdanynda 1200 basqa arnalǵan 2 fermanyń qurylysy júrgizilýde. Bıylǵy jyly Aqsý qalasynyń aýyldyq aımaǵynda 600 basqa arnalǵan taýarly-sút fermasy qoldanysqa engiziledi, «Laktalıs» fransýz kompanııasy Pavlodar aýdanyndaǵy taýarly-sút fermasynyń qurylysyna ınvestısııa tartýdy josparlap otyr. Jalpy, asyl tuqymdy mal sharýashylyǵyn damytý, mal sharýashylyǵynyń ónimdiligi men ónim sapasyn arttyrý úshin 1101 sharýashylyqqa 3,2 mlrd. teńge kóleminde sýbsıdııa berildi.
Mine, oblys ákiminiń esepti kezdesýinde osyndaı josparly júzege asyp jatqan ıgi ister aıtyldy. Oblys ákimine saýal qoıǵan aýyldyqtar, mysaly, baıanaýyldyq Sansyzbaı Eleýov aýyldarǵa aldaǵy kóktemgi sý tasqyny qaýpi tónip turǵanyn, soǵan oraı ákimdik qandaı sharalar jasap jatqanyn surady. Qanat Bozymbaev sý tasqynynyń aldyn alý úshin arnaıy sharalar jasalyp jatqanyn, aldaǵy ýaqytta aýdanǵa arnaıy komıssııa baratynyn jetkizdi. Bıyl qysta oblys ortalyǵynda bolǵan jylý júıelerindegi apattyń zardaby taǵy qaıtalanbas úshin qandaı sharalar jasalýda dep surady turǵyndar. Bul jumystar da baqylaýda ekeni, aldaǵy qysqa daıyndyq qazirden bastalǵany aıtyldy. Aýyldyqtar ádetinshe jol, taza sýmen qamtamasyz etý sııaqty kúrdeli máselelerdi kóterdi. Q.Bozymbaev aýyldyqtardy qınap júrgen qıyn máseleniń biri – biz gazetimizde jazǵan Lebıaji aýdany kólderindegi artemııa salına qurttaryn aýlaý úshin ol jaqta zaýyt salynatynyn jetkizdi.
Farıda BYQAI,
«Egemen Qazaqstan».
Pavlodar oblysy.