Oblys ortalyǵyndaǵy «Saıajaılar» shaǵyn aýdanynda ashylǵan №37 mektep, aıtary joq, jarqyrap tur. Ekinshiden, bul mektep qalanyń shetki jaǵynda ornalasqan. Qazir bul aýdanda da eńseli bıik úıler boı kóterýde. Shaǵyn aýdannyń balalary aralas mektepterde, basqa qazaq mektepterinde bilim alyp júrdi. Endi olar synyptarymen jáne synyp jetekshilerimen osynda keldi. Bul jaqta turatyn ata-analarǵa qaıta jaqsy boldy. Buryn qazaq tilinde bilim alsyn dep balalaryn ortalyqqa aparatyn edi. Úsh qabatty záýlim mekteptiń qurylys jumystaryna respýblıkalyq jáne oblystyq bıýdjetten 2 mlrd 134 mıllıon teńge bólindi. Oblys ákimi Qanat Bozymbaevtyń aıtýynsha, 1200 oqýshyǵa arnalǵan qazaq tilindegi mektep Ekibastuz qalasynda da ashylmaq. Qazirgi zaman talabyna saı boı kótergen mektepte 51 oqý kabıneti, ıaǵnı ınformatıka, fızıka, bıologııa, hımııa kabınetteri arnaıy qurylǵylarmen jabdyqtalǵan. Kitaphana, ashana, sport zaly bar. Aýlasynda sportpen shuǵyldaný úshin túrli alańdar jasaqtalǵan. Aldaǵy qyrkúıek aıynda taǵy 500 oqýshymen tolyqpaqshy.
Jańa mekteptiń dırektory Láılá Júnisovanyń aıtýynsha, bul qazir bilim alyp júrgen 700 oqýshynyń qatary tolyǵyp, oqý baǵdarlamasy da erekshe bolmaq. Erekshe delinetini – jańa mektepke biliktiligi joǵary ustazdar tańdap alynypty. Árbir negizgi pánder boıynsha sanattary joǵary jáne «Kembrıdj» baǵdarlamasy boıynsha bilim sapasyn arttyrý kýrsy deńgeıiniń sertıfıkatynyń ıegerleri atanǵan muǵalimder sabaq beredi. №37 mektep oblysta ótken jyly paıdalanýǵa berilgen 5-shi jańa mektep. Buǵan deıin Sharbaqty, Qyzylaǵash, Kenjekól aýyldary men Qalqaman kentinde jańa mektepter ashyldy. Qurylys jumystaryn pavlodarlyq «Taza-Star» seriktestigi júrgizdi.
Farıda BYQAI,
«Egemen Qazaqstan».
PAVLODAR.
Sýretterdi túsirgen
Valerıı BÝGAEV.