BAQ ókilderimen kezdesý ótkizgen «Aq jol» partııasynyń tóraǵasy Azat Perýashev osylaı dedi. Onyń aıtýynsha, «Aq jol» demokratııalyq partııasy saılaýaldy naýqanyna kirisýge qajetti materıaldardy daıyndap, óńir-óńirlerge, aımaqtarǵa taratý jumystaryn bastamaq.
Úgit-nasıhat kezindegi kerekti zattar arasynda saılaýǵa túsýshiler jónindegi plakattar men saılaýaldy baǵdarlamalyq kitapsha, moıynoraǵyshtar jáne partııa belgisi qoıylǵan syrt kıimder de bar. Jáne de ony daıyndaý barysynda otandyq ónim men eldegi óndiris qoldanylǵan.
Mysaly, saılaýaldy naýqany boıynsha úgit-nasıhat júrgizýde paıdalanylatyn formalar Almatyda jasalǵan bolsa, basqa zattar Astanada daıarlanǵan. Sonymen qatar, eldiń jyly aımaqtaryna jeńil keýdesheler taratylmaq. Endigi kezekte atalǵan partııa 20 aqpannan bastap zańdy túrde úgit-nasıhat jumystaryn bastaýdy josparlap otyr.
Elmıra MÁTIBAEVA,
«Egemen Qazaqstan».