Qazaqstandyq akter Sanjar Mádıev Reseıdiń «Qorǵaýshylar» fılminde basty rólderdiń birin oınady. Bul kınotýyndyda Keńes zamanyndaǵy joıqyn kúsh ıeleriniń erlikteri baıandalady.
Mamandar atalǵan kartınany Gollıvýdtyń «Iks adamdar» atty blokbasteriniń analogy retinde baǵalap otyr. Sebebi, bul fılmde de tylsym kúshke ıe sýperqaharmandardan quralǵan top zulymdyqpen kúresip, beıbitshilik úshin qan tógedi.
Oqıǵa jelisi boıynsha top músheleri uzaq ýaqyt ózderiniń kim ekenderin jasyryp, qarapaıym halyqpen birge ómir súredi. Al el basyna kún týǵan soǵys kezinde olar atqa qonyp, halyqty jaýyzdyqtan qutqarady. Qaharmandardyń barlyǵy KSRO quramynda bolǵan ártúrli ulttyń ókilderi. Sondyqtan fılm barysynda ár myqtynyń ózindik erekshelikterimen qatar, ulttyq bolmysy men dástúri de eskerilgen.
S.Mádıev kartınada Han esimdi jelden de jyldam qorǵaýshynyń rólin oınaıdy. Sol sebepti de ony top músheleri jel-adam dep ataıdy.
Aıta keteıik, fılmniń rejısseri Sarık Andreasıan da Qazaqstannyń týmasy. Ol Qostanaı qalasynda týyp-ósken. Rejısserdiń aıtýynsha, jańa fılm 2017 jyldyń aqpan aıynda kórermen nazaryna usynylmaq.
Ernar MUHAMBET.