Qazaqstan Prezıdenti janyndaǵy Ortalyq kommýnıkasııalar qyzmeti oblystyq fılıalynda saılaýdy baıqaý jumysynyń maqsattary men mindetteri tanystyryldy.
Saılaýdy baıqaý jónindegi respýblıkalyq qoǵamdyq komıssııa oblystyq fılıalynyń tóraıymy Vera Shohına qoǵamdyq komıssııa óz jumysyn resmı túrde bastaǵanyn, búgingi kúni baıqaýshylardy irikteý jumystary júrgizilip jatqanyn málim etti.
Komıssııa jumysynyń maqsaty – óńirimizde Saılaýdy baıqaý jónindegi respýblıkalyq qoǵamdyq komıssııanyń júıeli jumysyn, onyń mıssııalarynyń oryndalýyn qamtamasyz etý. Baıqaýshy barlyq kezeńde saılaý úderisiniń barysyna saraptama júrgizip, saılaýdyń ashyqtyǵyna, zańnamanyń saqtalýyna qolǵabys etedi. Úmitkerlerdiń quqyqtary buzylmaı, jaǵdaılary teń, ádiletti bolýy da baıqaýshy nazarynda.
V.Shohınanyń aıtýynsha, búgingi kúnnen bastap baıqaýshylardy irikteý maqsatynda komıssııa músheleri aýyl-aımaqtarǵa barady. Baıqaýshylardy tańdaýda olardyń ýchaskelik komıssııa músheleri, úmitkerlerdiń saılaýaldy shtaby quramynda bolmaýy jáne eshqandaı partııanyń eriktisi bolmaýy mańyzdy.
Baıqaýshylar iriktelgen soń, semınar-trenıngter arqyly oqytylady. Saılaýdyń ótý barysy týraly erejelermen tolyq tanysýy úshin ádistemelik quraldar taratylady. Olarǵa qoıylatyn basty talap – «Saılaý týraly» Zańdy múltiksiz oryndaý. Oqý qorytyndysynan keıin baıqaýshylar testileýden ótip, saılaý kúni ár saılaý ýchaskesinde jumys isteıdi.
Elmıra NUǴMANOVA,
jýrnalıst.
Temir QUSAIYN,
«Egemen Qazaqstan».
ORAL.