Keshe Astanada Qazaqstan Respýblıkasynda Saılaýdy baıqaý jónindegi respýblıkalyq qoǵamdyq komıssııa (SBRQK) óziniń kezekti semınar-trenıngin ótkizdi. «Baıqaýshynyń quqyqtary men mindetteri. Parlament Májilisi jáne barlyq deńgeıdegi máslıhattar depýtattarynyń saılaýlaryn baıqaýshylardyń qyzmetindegi ádister men tásilder» taqyrybyndaǵy bul shara astanalyq baıqaýshylar úshin uıymdastyryldy.
Semınar-trenıngti ashqan SBRQK múshesi Arman Eshmuratov qatysýshylarǵa birinshi kezekte aldaǵy saılaý naýqanynyń elimiz úshin mańyzdy ekenin túsindirip ótti. Sondaı-aq, ol saılaýdyń óz deńgeıinde ótýine baıqaýshylardyń saýatty ári belsendi qyzmeti tikeleı áser etetinin jetkizdi.
«Bizge qazirgi tańda baıqaýshylarǵa ózderiniń saılaý kezindegi quqyǵy men mindetterin jete uǵyndyrý kerek. Baıqaýshylardyń árbir is-áreketi saýatty bolǵany jón. О́zderińiz biletindeı, aldaǵy saılaýdyń halqymyz úshin, elimizdiń keleshegi úshin mańyzy zor.
Bizdiń baıqaýshylarymyz buǵan deıin de osyndaı mańyzdy naýqanda belsendi jumys istegen. Olardyń tájirıbeleri bar. Degenmen, ár saılaýdyń ózindik basty erekshelikteri bolatyndyqtan, baıqaýshylardyń daıyndyqtaryn pysyqtaǵan jón. Qazir biz saılaý kúni baıqaýshylardyń barlyǵy saqadaı saı bolýyn qamtamasyz etý maqsatynda tıisti jumystardy júrgizip jatyrmyz. Sonyń bir dáleli retinde osy ótkizilip otyrǵan semınar-trenıngti aıtar edim. Jalpy, biz saılaýdyń ashyq ári taza ótýine múddelimiz. Bul óz kezeginde baıqaýshylarǵa úlken jaýapkershilik artady», – dedi Arman Eshmuratov. SBRQK múshesiniń aıtýynsha, baıqaýshylar kúnine 2 AEK kóleminde jalaqy alady. 20 naýryzda jumysqa kirisetin olar ázirge arnaıy daıyndyqtan ótedi.
Saılaý kúni daýys berýdiń barysyn qadaǵalaıtyn SBRQK baıqaýshylarynyń biliktiligin arttyrýǵa baǵyttalǵan bul sharada L.N.Gýmılev atyndaǵy Eýrazııa ulttyq ýnıversıteti saıasattaný kafedrasynyń professory mindetin atqarýshy, saıası ǵylymdar kandıdaty Marına Onýchko saılaýdy baıqaý úderisindegi baıqaýshynyń róli, quqyqtary men mindetteri turǵysynda keńes berdi. M.Onýchko baıqaýshy daýys berý barysyn qadaǵalap, barlyq hattamalarmen tanysyp, beıne, aýdıo jazýǵa, qandaı da bir zań buzýshylyq kórse, ony aktpen tirkeýge quqyly ekenin jetkizdi.
Sondaı-aq, ol baıqaýshylardyń mindetterin de atap kórsetti. Onyń aıtýynsha, baıqaýshylar saılaý komıssııalarynyń jumysyna aralaspaýy kerek. Bul úshin ol ákimshilik jáne qylmystyq jaýapkershilikke tartylýy múmkin. Buǵan qosa, M.Onýchko baıqaýshylardyń bulardan basqa da quqyqtary men mindetterin túsindirip ótti.
Odan ári sóz alǵan SBRQK múshesi Talant Ramazanov baıqaýshylardyń qyzmetindegi ádister men tásilder jóninde aıtyp berdi. Sondaı-aq, ol baıqaýshylar saılaý úderisine bóget jasamaý qajettigin, tek daýys berýdiń zańnamalarǵa sáıkes júrgizilýin qadaǵalap otyrýy tıis ekenin jetkizdi.
Semınar-trenıng barysynda SBRQK respýblıkalyq shtaby tarapynan ázirlengen baıqaýshynyń ádistemelik quraly tanystyryldy.
Joldybaı BAZAR,
«Egemen Qazaqstan».